वासिङ्टन । अमेरिकाको न्याय मन्त्रालयले बेलायत र युरोपका विभिन्न ठाउँमा आक्रमण गर्ने षड्यन्त्र रचेको आरोपमा इरानसँग सम्बन्धित तीन जनाविरुद्ध मुद्दा दायर गरेको छ। तीमध्ये एकजनाविरुद्ध बेलायतको रोयल एयर फोर्स फेयरफोर्ड हवाई अड्डालाई निशाना बनाएको आरोप पनि छ, जहाँ अमेरिकी सैनिकहरू तैनाथ थिए।
मुद्दा लागेकाहरूमा इरानी नागरिक मोहसेन मोहाजेरी, इराकी नागरिक मोहम्मद अली अल-हसानी र इरानी–इराकी दोहोरो नागरिकता भएका मोहम्मद बाकेर साद दाउद अल-सादी छन्। मंगलबार सार्वजनिक भएको आठ बुँदे अभियोगपत्रमा उनीहरूले आफूलाई ‘हरकत अशाब अल-यामिन अल-इस्लामिया’ नामको समूहका सदस्य भन्दै आक्रमणहरूको जिम्मेवारी लिने गरेको उल्लेख छ। सन् २०२६ को वसन्तमा सो समूहले युरोपमा १८ वटा आक्रमणको जिम्मा लिएको थियो, जसमध्ये सातवटा बेलायतमा भएका थिए।
एफबीआई निर्देशक काश पटेलका अनुसार तीनै अभियुक्त इरानको इस्लामिक रिभोलुसनरी गार्ड कोर र इरान समर्थित इराकी सशस्त्र समूह कताइब हिज्बुल्लाहको सहयोगमा करिब २० वटा आक्रमणका प्रयासमा संलग्न रहेको आरोप छ। अभियोगपत्रमा एक अभियुक्तले न्युयोर्कको जेलबाटै भविष्यमा हुने हिंसात्मक गतिविधिका लागि सांकेतिक सन्देश पठाएको उल्लेख छ। उनी यसअघि दर्ता भएका अन्य मुद्दाको सुनुवाइको प्रतीक्षामा जेलमा छन् भने बाँकी दुईले इरानबाटै सम्पर्क र समन्वय गरेको आरोप छ।
गत सेप्टेम्बर २७ मा फेयरफोर्ड हवाई अड्डानजिक तीनवटा शङ्कास्पद भ्यान देखिएपछि प्रहरीले ठूलो सुरक्षा घटना घोषणा गरेको थियो। भ्यानबाट विस्फोटक पदार्थ भेटिएन तर केही मात्रामा पेट्रोल बरामद भएको थियो। अभियोगपत्रका अनुसार अल-हसानीले अगस्टमै बेलायतमा रहेका आफ्ना सहयोगीलाई हवाई अड्डाको निगरानी गर्न र आक्रमणको तयारी मिलाउन निर्देशन दिएका थिए।
उक्त घटनापछि अमेरिकाले फेयरफोर्डबाट आफ्ना सबै बमवर्षक विमान फिर्ता लगेको थियो। राष्ट्रपति डोनाल्ड ट्रम्पले सुरक्षा जोखिमलाई विमान फिर्ता गर्नुको कारण बताएका थिए। यता इरानले भने घटनामा आफ्नो संलग्नता अस्वीकार गर्दै आएको छ।
