वासिङ्टन — अमेरिकी राष्ट्रपति डोनाल्ड ट्रम्पले बेलायती प्रसारण संस्था बिबिसीविरुद्ध दायर गरेको मानहानिसम्बन्धी मुद्दा अघि बढ्ने भएको छ। सङ्घीय अदालतका न्यायाधीशले बिबिसीले गरेको खारेजीको माग अस्वीकार गर्दै मानहानिको दाबी सुनुवाइका लागि योग्य ठहर गरेका छन्।
ट्रम्पको दाबीअनुसार बिबिसीले सन् २०२१ जनवरी ६ मा क्यापिटल भवनमा भएको आक्रमणअघि उनले दिएको भाषणलाई भ्रामक ढंगले सम्पादन गरेको थियो। त्यस सम्पादनले उनले समर्थकहरूलाई हिंसामा उक्साएको जस्तो देखिएको उनको आरोप छ। यही कारण उनले कम्तीमा पाँच अर्ब अमेरिकी डलर क्षतिपूर्ति माग गरेका हुन्।
न्यायाधीश जेफ्री टी कुन्जले मानहानिसम्बन्धी दाबी अघि बढाउन अनुमति दिए पनि फ्लोरिडाको उपभोक्ता संरक्षण कानूनअन्तर्गत दायर गरिएको छुट्टै दाबी भने खारेज गरिदिएका छन्।
बिबिसीले वृत्तचित्रको सम्पादनप्रति यसअघि नै माफी मागिसकेको छ। तर संस्थाले ट्रम्पलाई वास्तविक क्षति पुगेको भन्ने दाबीलाई भने अस्वीकार गर्दै आएको छ।
अनुमतिपछि ट्रम्पले फैसलालाई ‘ठूलो विजय’ को संज्ञा दिएका छन्। उनले अमेरिकी जनतालाई धोका दिन खोज्नेहरूविरुद्ध लडिरहने बताएका छन्। यसअघि अदालतले उनलाई डिसेम्बर ११ भित्र मुद्दासम्बन्धी बयान दिन आदेश दिएको थियो। तोकिएको समयमा उपस्थित नभए मुद्दा खारेज हुन सक्ने चेतावनीसमेत दिइएको छ।
