इन्डियन प्रिमियर लिग (आईपीएल) को आगामी २०२७ सिजनअघि मुम्बई इन्डियन्स र पञ्जाब किङ्सबीच खेलाडी साटासाटको ठूलो सम्झौता भएको छ। यस सम्झौताअन्तर्गत मुम्बईका कप्तान हार्दिक पान्ड्या पञ्जाब किङ्समा जानेछन् भने भारतीय टोलीका तीव्र गतिका बलर अर्शदीप सिंह मुम्बई इन्डियन्समा आबद्ध हुनेछन्।
पान्ड्याको मुम्बईसँगको यो दोस्रो कार्यकाल यसैसँग टुंगिएको छ। उनी सन् २०१५ मा पहिलोपटक मुम्बईमा आबद्ध भएका थिए र टोलीसँग २०१५, २०१७, २०१९ र २०२० गरी चार पटक उपाधि जितेका थिए। मुम्बईमा सात सिजन बिताएपछि उनी सन् २०२२ मा गुजरात टाइटन्स पुगेका थिए, जहाँ पहिलो सिजनमै कप्तानका रूपमा टोलीलाई उपाधि दिलाएका थिए। गुजरात सन् २०२३ मा पनि फाइनलसम्म पुगेको थियो। त्यसपछि सन् २०२४ मा मुम्बई फर्किएका पान्ड्याले टोलीको कप्तानी सम्हालेका थिए।
आईपीएलमा १६२ खेल खेलेका पान्ड्याले २ हजार ९५५ रन बनाउनुका साथै ८२ विकेट लिएका छन्। उनको स्ट्राइक रेट १४६.२८ रहेको छ। पञ्जाबमा उनी १८ करोड भारुमा आबद्ध हुनेछन्, जुन उनले मुम्बईमा पाउँदै आएको १६ करोड ३५ लाख भारुभन्दा बढी हो।
यता, अर्शदीप सिंहले पञ्जाबमा आठ सिजन बिताएका थिए। सन् २०१९ मा आईपीएलमा डेब्यु गरेका उनी पञ्जाबका प्रमुख बायाँहाते तीव्र गतिका बलरका रूपमा स्थापित भएका थिए। पञ्जाबका लागि ९६ खेलमा १११ विकेट लिएका उनी टोलीका लागि आईपीएलमा सर्वाधिक विकेट लिने बलर हुन्। उनले सन् २०२५ को सिजनमा २१ र सन् २०२६ मा १४ विकेट लिएका थिए। मुम्बईमा उनी यसअघि पाउँदै आएको १८ करोड भारु नै पाउनेछन्। अर्शदीप भारतका टी–२० अन्तर्राष्ट्रिय क्रिकेटमा सर्वाधिक विकेट लिने बलरसमेत हुन्। उनको आगमनले मुम्बईको बलिङ आक्रमण थप बलियो हुने अपेक्षा गरिएको छ।
