ताइपेई । शक्तिशाली सुपर टाइफुन ‘चाम्पी’ ताइवानतर्फ अघि बढ्दै गएपछि पूर्वी एसियामा हवाई सेवा प्रभावित भएको छ । सयौँ उडान रद्द भएका छन् भने ताइवानमा विद्यालय, सरकारी कार्यालय र सेयर बजार बन्द गरिएको छ ।
अधिकारीहरूका अनुसार चाम्पी शुक्रबार ताइवानमा प्रवेश गर्ने अनुमान छ । आँधीसँगै प्रतिघण्टा १७३ किलोमिटरसम्मका झोक्कासहित तीव्र हावा चल्ने र भारी वर्षा हुने पूर्वानुमान गरिएको छ । आँधीको प्रभाव करिब ३२० किलोमिटरको दायरामा फैलिने भएकाले पूरै टापु नै प्रभावित हुन सक्ने बताइएको छ ।
ताइवान सरकारले २२ मध्ये २१ काउन्टी तथा सहरमा शुक्रबार विद्यालय र कार्यालय बन्द गरेको छ । किनमेन क्षेत्रमा भने काम र पढाइ सामान्य रूपमा सञ्चालन हुने जनाइएको छ । विश्वकै ठूला सेयर बजारमध्ये एक ताइवानको सेयर बजार पनि शुक्रबार बन्द राखिएको छ ।
स्थानीय सञ्चारमाध्यमका अनुसार ताइवानमा शुक्रबारका लागि निर्धारित सबै २६२ आन्तरिक उडान र ६६० भन्दा बढी अन्तर्राष्ट्रिय उडान रद्द गरिएको छ । रेल तथा फेरी सेवा पनि रोकिएका छन् भने केही राजमार्ग बन्द गरिएको छ ।
जापानमा पनि जापान एयरलाइन्स र एएनएसहितका प्रमुख वायुसेवा कम्पनीले बिहीबारदेखि आइतबारसम्मका १०० भन्दा बढी उडान रद्द गरेका छन्, जसबाट कम्तीमा ११ हजार यात्रु प्रभावित हुने अनुमान छ ।
आँधी नजिकिँदै गर्दा ताइवानमा एक जनाको ज्यान गएको छ भने ९४ जना घाइते भएका छन् । लिउचिउ टापुनजिकै समुद्री छालले बगाउँदा एक जनाको मृत्यु भएको हो । एक हजारभन्दा बढी मानिसलाई सुरक्षित स्थानमा सारिएको छ ।
राजधानी ताइपेईका केही क्षेत्रमा २४ घण्टाभित्र २०० मिलिमिटरभन्दा बढी वर्षा भएको छ । आँधी शनिबार उत्तरतर्फ मोडिएर त्यसपछि जापानतिर अघि बढ्ने सम्भावना छ । यस वर्ष जापानमा चाम्पी ३०औँ टाइफुन हो, जुन सन् २०१३ पछिको सबैभन्दा उच्च सङ्ख्या हो ।
