ललितपुर — पैदलयात्रीलाई सडक पार गर्न सहज बनाउन ललितपुरको कुसुन्तीमा अत्याधुनिक आकाशे पुल निर्माण भइरहेको छ। लिफ्टसहित बन्न लागेको यो पुल ज्येष्ठ नागरिक, अपांगता भएका व्यक्ति तथा बालबालिकालाई समेत सहज हुने गरी डिजाइन गरिएको छ।
ललितपुर महानगरपालिका–१३ का वडाध्यक्ष गणेश केसीका अनुसार यो पुलको अवधारणा जन्माउने नै सडक पार गर्ने क्रममा भएका दुर्घटनाले हो — उक्त क्षेत्रमा बाटो काट्ने क्रममा १९ जनाले ज्यान गुमाइसकेका छन्। एक पटक ६ महिनाको शिशु बोकेकी आमाको सल मोटरसाइकलमा अल्झिँदा शिशु सडकमा खसेर ज्यान गएको थियो। त्यसपछि पैदलयात्री सुरक्षाका लागि पुल निर्माण गर्ने निर्णय गरिएको केसीले बताए।
तर निर्माण प्रक्रिया सहज भएन। महानगरले आफैँ पैसा हालेर बनाउने प्रस्ताव गर्दा पनि सडक विभागबाट सहयोग पाउन कठिन भएको केसीको भनाइ छ। बजेट पुस्तिकामा योजना समावेश भए पनि काम अघि नबढ्दा चार वर्ष बितेको थियो। पछि तत्कालीन भौतिक पूर्वाधार तथा यातायातमन्त्री प्रकाश ज्वालासँग छलफलपछि डिजाइन र निर्माण प्रक्रियाले गति लियो।
प्रस्तावित डिजाइनमा कफी सप, दुई–तीनवटा सटर, शिशुलाई दूध खुवाउने छुट्टै ठाउँ, शौचालय र सुरक्षाकर्मीको कोठासम्मको योजना थियो। तर डिजाइनका केही भाग हटाउने विषय र सुरक्षा जिम्मेवारीमा विवाद भएपछि छलफल र सहमतिमा डिजाइन स्वीकृत गरिएको हो।
सबैभन्दा ठूलो समस्या माथिल्लो संरचना जडान गर्दा देखियो — चितवनमा ग्याल्भेनाइज गरेर ल्याइएको फ्रेममा प्राविधिक त्रुटि भेटियो, र ४–५ वटा टुक्रा काटेर फेरि ग्याल्भेनाइज गर्न पठाउनुपर्यो। यही प्रक्रियाले निर्माणमा करिब आठ महिना ढिलाइ भयो।
वडाध्यक्ष केसीका अनुसार छठ पर्वअघि वा त्यसलगत्तै पुल उद्घाटन गर्ने लक्ष्य छ। लिफ्टसहितको यस्तो आकाशे पुल नेपालमै पहिलो पटक परीक्षणका रूपमा निर्माण गर्न लागिएको उनको दाबी छ।
