नेपाली कांग्रेसका नेता तथा सांसद अर्जुननरसिंह केसीले मूल्यवृद्धि नियन्त्रण र सुशासन कायम गर्न सरकार चुकेको बताएका छन्। जनताका समस्याप्रति सरकार उदासीन बनेको उनको आरोप छ।
दसैँ, तिहार र छठका अवसरमा शुभकामना दिँदै केसीले सरकार बनेको सात महिना पुग्न लाग्दा पनि सर्वसाधारणको दैनिक जीवनमा अनुभूत हुने परिवर्तन नआएको बताएका छन्। चाडपर्वका समयमा बजार भाउ अस्वाभाविक बढ्दा आम मानिसको जीवनयापनमा असर परेको उनले उल्लेख गरेका छन्। बजार अनुगमन प्रभावकारी नभएको र कालोबजारी रोक्न सरकार असफल भएको उनको भनाइ छ।
वर्तमान सरकारप्रति जनतामा निराशा बढ्दै गएको बताउँदै केसीले त्यसलाई समयमै सम्बोधन गर्नुपर्नेमा जोड दिएका छन्। जनताको निराशा जुनसुकै बेला आक्रोशमा परिणत हुन सक्ने भएकाले सरकारले जनगुनासोलाई गम्भीर रूपमा लिनुपर्ने उनको सुझाव छ।
जेनजी आन्दोलनको भावना र निर्वाचनबाट पाएको जनादेशअनुसार राज्य चलाउने तरिका बदलिनुपर्ने भए पनि पुरानै कार्यशैली र प्रवृत्ति दोहोरिएको उनले बताएका छन्। नेतृत्व फेरिए पनि जनताले अपेक्षा गरे अनुसार काम हुन नसकेको उनको टिप्पणी छ।
राजनीतिक नियुक्ति तथा प्रशासनिक सरुवा–बढुवामा देखिने मनपरी अन्त्य गर्दै योग्यता, क्षमता र पारदर्शिताका आधारमा निर्णय गर्न केसीले सरकारलाई आग्रह गरेका छन्।
रोजगारी नपाएर युवापुस्ता विदेशिनुपर्ने अवस्था रोक्न ठोस योजना ल्याउनुपर्ने उनको भनाइ छ। युवालाई स्वदेशमै राख्न शिक्षा, रोजगारी, सुशासन र न्यायको प्रत्याभूतिसहित आर्थिक तथा सामाजिक कार्यक्रम अघि बढाउनुपर्ने उनले बताएका छन्।
बदलिँदो विश्व परिस्थिति, नेपालको संवेदनशील भूराजनीतिक अवस्था र कठिन आर्थिक अवस्थालाई ध्यान दिँदै सरकारले स्पष्ट रणनीति बनाउनुपर्नेमा पनि उनले जोड दिएका छन्। जनताका जायज प्रश्नको जवाफ दिनुको साटो विगतका सरकारको आलोचनाले मात्र नेतृत्वको दायित्व पूरा नहुने उनको भनाइ छ। उनले गुनासा सम्बोधन गर्न, असन्तुष्टिलाई सकारात्मक परिवर्तनमा बदल्न र राष्ट्रिय सहमति जोगाउन सरकार गम्भीर हुनुपर्ने बताएका छन्।
