अमेरिकी राष्ट्रपति डोनाल्ड ट्रम्पको जनसमर्थनमा थोरै सुधार देखिएको छ। रोयटर्स र इप्सोसले गरेको पछिल्लो सर्वेक्षणमा उनको समर्थनदर अघिल्लो साताको अहिलेसम्मकै कम बिन्दुबाट एक प्रतिशत विन्दुले उक्लिएर ३२ प्रतिशत पुगेको छ। नोभेम्बर ३ मा हुन लागेको मध्यावधि निर्वाचनअघि गरिएको यो सर्वेक्षण सोमबार सम्पन्न भएको थियो।
कंग्रेसको नियन्त्रण कुन दलले लिनुपर्छ भन्ने प्रश्नमा दर्ता भएका मतदातामध्ये ४७ प्रतिशतले डेमोक्र्याटिक र ३६ प्रतिशतले रिपब्लिकन पार्टीलाई रोजेका छन्। ११ प्रतिशत मतदाता अझै अनिर्णीत छन्। अक्टोबर १९ को सर्वेक्षणको तुलनामा डेमोक्र्याटको अग्रता एक प्रतिशत विन्दुले खुम्चिएको छ। कुनै दलतर्फ झुकाव राख्ने अनिर्णीत मतदातालाई समेत गन्दा डेमोक्र्याटको समर्थन ५० प्रतिशत र रिपब्लिकनको ४१ प्रतिशत देखिन्छ।
मतदान गर्ने सम्भावना बढी भएका मतदातामाझ पनि डेमोक्र्याट ५३ प्रतिशत समर्थनसहित अगाडि छ भने रिपब्लिकन ४४ प्रतिशतमा छ। विश्लेषकहरूले प्रतिनिधिसभामा डेमोक्र्याटले बहुमत पाउने सम्भावना राम्रो देखेका छन्, तर सिनेटमा भने उसलाई कठिन चुनौती रहेको बताएका छन्। कंग्रेसको एउटा सदनमा मात्र नियन्त्रण गुमे पनि ट्रम्पलाई बाँकी दुई वर्ष आफ्ना नीति अघि बढाउन गाह्रो पर्न सक्ने विश्लेषण छ।
सर्वेक्षणमा सहभागी ७३ प्रतिशत मतदाताले जीवनयापनको लागत गलत दिशातर्फ गइरहेको बताएका छन्, र महँगी नै मतदाताको प्रमुख चासो बनेको छ। अर्थतन्त्र सम्हाल्न डेमोक्र्याटलाई ३७ प्रतिशत र रिपब्लिकनलाई ३३ प्रतिशतले उपयुक्त ठानेका छन्। मतदानप्रति डेमोक्र्याट समर्थक बढी उत्साहित देखिएका छन् — ४६ प्रतिशतले आफूहरू निकै उत्साहित रहेको बताए, जबकि रिपब्लिकन समर्थकमा यो दर ३० प्रतिशत मात्र छ। अनलाइन गरिएको सर्वेक्षणमा १ हजार ६७९ वयस्क सहभागी थिए, जसमध्ये १ हजार २८० दर्ता भएका मतदाता थिए।
