पूर्वराष्ट्रपति विद्यादेवी भण्डारीको हालैको चीन भ्रमणमा कुनै पनि राजनीतिक भेटवार्ता र छलफल नभएको उनको टोलीले दाबी गरेको छ। भण्डारीसँगै भ्रमणमा गएका एक सदस्यका अनुसार यसपटकको भ्रमण विशुद्ध गैरराजनीतिक र सार्वजनिक प्रकृतिको थियो।
भण्डारी कात्तिक ५ देखि ९ गतेसम्म चीनमा रहेकी थिइन्। उनी चीनको हपेई प्रान्तको स्योङआनमा आयोजित ग्लोबल गभर्नेन्स फोरममा विशिष्ट अतिथिका रूपमा सहभागी भएकी थिइन्। उक्त फोरम चाइना पिपुल्स इन्स्टिच्युट अफ फरेन अफेयर्सले आयोजना गरेको थियो।
परिवर्तनशील विश्वमा विश्वास र सहकार्यको पुनर्निर्माण विषयमा भएको सम्मेलनमा झन्डै एक सय २० देशका करिब दुई सय प्रतिनिधि सहभागी थिए। सम्मेलनमा पूर्वराष्ट्रप्रमुख, सरकारप्रमुख, बहालवाला तथा पूर्वमन्त्री र कूटनीतिक क्षेत्रका विज्ञहरू उपस्थित थिए। भण्डारीले शनिबार सम्मेलनलाई सम्बोधन गरेकी थिइन्।
आफ्नो सम्बोधनमा उनले जलवायु परिवर्तन, खाद्य असुरक्षा, असमानता, गरिबी र भूराजनीतिक तनावजस्ता साझा चुनौती सामना गर्न संवाद, सहकार्य र सामूहिक प्रतिबद्धता आवश्यक रहेको बताएकी थिइन्। उनले नेपाल-चीन सम्बन्ध, पञ्चशीलका सिद्धान्त, पारस्परिक सम्मान र विश्वासबारे पनि चर्चा गरेकी थिइन्। एक चीन नीतिप्रति नेपालको प्रतिबद्धता उनले स्पष्ट पारेकी थिइन्।
स्वदेश फर्किने क्रममा त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै भण्डारीले आफू भ्रमणका लागि नभई सम्मेलनमा सहभागी हुन चीन गएको र सम्मेलनमा राखेका विषय सार्वजनिक भइसकेको बताएकी थिइन्।
टोलीका सदस्यका अनुसार कार्यक्रममा सहभागी विभिन्न देशका प्रतिनिधिहरूसँग सामूहिक शिष्टाचार भेटबाहेक कुनै व्यक्तिगत वा राजनीतिक भेटघाट भएन। चिनियाँ विदेशमन्त्री वाङ यीसँग पनि सामूहिक भेटमात्र भएको उनले बताए। चिनियाँ कम्युनिस्ट पार्टीको केन्द्रीय कमिटी बैठक नजिकिएकाले पनि छुट्टै भेटघाटमा चासो नदेखिएको हुन सक्ने टोलीको भनाइ छ।
आयोजकले भण्डारीलाई गत जेठमै निमन्त्रणा पठाएको थियो। उनलाई पूर्वराष्ट्रप्रमुखको हैसियतमा निमन्त्रणा गरिएको टोलीले जनाएको छ।
