संसदीय सुनुवाइ समितिबाट नाम अनुमोदन भएका १० जना राजदूतको नियुक्ति प्रक्रिया सम्बन्धित देशबाट सहमति (एग्रिमो) नआएकाले रोकिएको छ। सरकारले दसैँअघि नै ती देशहरूलाई सहमतिका लागि पत्र पठाइसकेको परराष्ट्र मन्त्रालय स्रोतले जनाएको छ। सहमति प्राप्त भएपछि राष्ट्रपतिले नियुक्ति गर्नेछन् र उनीहरू सम्बन्धित मुलुक जानेछन्।
सरकारले विज्ञापनमार्फत छनोट गरी १३ देशका लागि राजदूतको नाम सिफारिस गरेको थियो। तीमध्ये समितिले १० जनाको नाम अनुमोदन गरेको हो। अनुमोदित सूचीमा भारतका लागि डा. निश्चलराज पाण्डे, चीनका लागि डा. कल्याणराज शर्मा, अमेरिकाका लागि चिरनजंग थापा, बेलायतका लागि गौरवशमशेर जबरा, इजरायलका लागि सुरेश कर्ण, दक्षिण कोरियाका लागि डा. संगम श्रेष्ठ, स्पेनका लागि प्राप्ति शेरचन, श्रीलंकाका लागि डा. मञ्चला झा, जर्मनका लागि सरु जोशी र ओमानका लागि डा. पद्याक्षी राणा छन्।
हालसम्म कुनै पनि मुलुकले सहमति पठाएको छैन। सिफारिस भएका १३ जनामध्ये साउदी अरेबियाका लागि प्रस्तावित गिरीबहादुर सुनारको नाम गम्भीर उजुरी परेपछि अस्वीकृत भएको थियो भने मलेसियाका लागि प्रस्तावित चूडामणि खरेलको नाम पनि अस्वीकृत भयो। जापानका लागि प्रस्तावित जिज्ञानकुमार थापाका विषयमा भने समितिले थप अध्ययन गर्ने भएको छ।
यसैबीच परराष्ट्र मन्त्रालयले बाँकी देशका लागि राजदूत सिफारिस गर्ने गृहकार्य सुरु गरेको छ। केही दूतावासमा राजदूतको पद रिक्त छ भने बंगलादेश, ब्राजिल, म्यानमार, बहराइन र इजिप्टमा म्याद सकिएका राजदूतलाई अर्को व्यवस्था नभएसम्मका लागि थप गरिएको छ। ती मुलुकमा क्रमशः घनश्याम भण्डारी, निर्मलराज काफ्ले, हरिश्चन्द्र घिमिरे, तीर्थराज वाग्ले र सुशील लम्साल कार्यरत छन्।
