गोरखामा बूढीगण्डकीको बाढी आएको १६ दिन बितिसक्दा पनि क्षतिग्रस्त सडक र पुल मर्मतको काम निरन्तर चलिरहेको छ। स्थानीय बासिन्दा र सम्बन्धित निकायको सक्रियताले बाढी प्रभावित क्षेत्रमा जनजीवन क्रमशः सामान्य बन्दै गएको छ।
असोज २५ गते हिमपहिरोले उङ्गिलुङ खोला थुनिएर खुलेपछि बूढीगण्डकीमा आएको बाढीले तल्लो तटीय क्षेत्रमा ठूलो क्षति पुर्याएको थियो। गोरखा जिल्ला प्रशासन कार्यालयको विवरणअनुसार बाढीले चुमनुब्री, धार्चे र आरुघाट गाउँपालिकामा एक सय आठ घर तथा गोठमा क्षति पुर्याएको छ। छ वटा झोलुङ्गे पुल, दुई वटा मोटरेबल पुल, एउटा बेलिब्रिज र यारु तथा सर्दीमा रहेका दुई वटा क्यान्टिलिभर पुल बाढीले बगाएको छ।
बेनिघाट–आरुघाट–लार्के सडक पुनः खोल्न सडक कार्यालय र नेपाली सेनाले संयुक्त रूपमा काम गरिरहेका छन्। गोरखा सडक योजना कार्यालयका सूचना अधिकारी आशिक रिजालका अनुसार १५ दिनको कामपछि कालोभिरसम्मको खण्ड प्रयोगयोग्य बन्दै गएको छ। आर्खेत–दोभान खण्ड सडक कार्यालयले र दोभान–सल्लेरी खण्ड सेनाले हेरिरहेको छ।
सल्लेरी–जगत बगर खण्डमा डेढ किलोमिटर क्षेत्रमा पाँच फिटभन्दा बढी हिलो रहेकाले सफा गर्न केही दिन लाग्ने कार्यदलका प्रमुख सेनानी रामसागर यादवले बताए। उक्त खण्ड खुलेपछि मानिस, खच्चड र मोटरसाइकल पाङसिङसम्म पुग्न सक्ने अपेक्षा गरिएको छ।
चुम उपत्यकातर्फ स्यार खोलामा चार वटा काठे पुल बनेपछि मानिस र खच्चडको आवतजावत सहज भएको छ। सर्दीभिरको क्यान्टिलिभर पुल बगाएपछि चुम उपत्यकाको आवतजावत ठप्प भएको थियो। धार्चे गाउँपालिकाका अध्यक्ष लक्ष्मण गुरुङका अनुसार स्थानीयले खोर्लाबेशीदेखि तातोपानीसम्म बाटो बनाएका छन् र खाद्यान्न ढुवानीका लागि ड्रोनसमेत प्रयोग गरिएको छ। सिर्दिबास उहिया सानो जलविद्युत् आयोजना चार दिनमै पुनः सञ्चालनमा आएको छ भने गोरखा र धादिङ जोड्ने आरुघाट पुल छ दिनमा मर्मत भएको छ।
