मुगुको खत्याड गाउँपालिका वडा नम्बर ८ र ११ का स्थानीयले देउडा नाच्दै गीतमार्फत आफ्ना पीडा र माग सुनाए। उनीहरूका बीचमा कर्णाली प्रदेशका मुख्यमन्त्री मंगलबहादुर शाही थिए। स्थानीयले देउडा गीतमा मुख्यमन्त्रीलाई पनि नचाए, तर त्यो नाचगान मनोरञ्जनका लागि मात्र थिएन।
वर्षौंदेखि विकासको पर्खाइमा रहेको खत्याडको आवाज सरकारसम्म पुर्याउने माध्यमका रूपमा स्थानीयले देउडालाई रोजेका थिए। गीतको भाकामा उनीहरूले खत्याडको समग्र विकास गर्न र पहिरोले अवरुद्ध सडक तत्काल खुलाउन माग गरे। सडक अवरुद्ध हुँदा भोग्नुपरेको सास्ती र विकासका लागि गर्नुपरेको प्रतीक्षालाई उनीहरूले सांस्कृतिक प्रस्तुतिमार्फत व्यक्त गरे।
मुख्यमन्त्री शाही कात्तिक ९ र १० गते पहिरो प्रभावित क्षेत्रको स्थलगत अनुगमनका लागि खत्याड पुगेका बेला स्थानीयले देउडामार्फत आफ्ना माग राखेका हुन्।
खत्याड–८ नुवाखेतमा असोज ११ गते ठूलो पहिरो खसेपछि बाजुराको हिमाली गाउँपालिकाबाट मुगु सदरमुकाम गमगढी जोड्ने मुख्य सडक अवरुद्ध छ। सुदूरपश्चिमबाट कर्णाली जोड्ने यो महत्त्वपूर्ण सडक बन्द हुँदा स्थानीयको आवागमन प्रभावित भएको छ भने रारा ताल पुग्ने यात्रुलाई समेत समस्या भएको छ।
सडक अवरुद्ध भएपछि स्थानीय झन्डै एक किलोमिटर जोखिमपूर्ण पहाडी उकालो पैदल हिँडेर आवतजावत गर्न बाध्य छन्। पहिरोले सडकसँगै नहर र झोलुङ्गे पुलमा समेत क्षति पुर्याएको छ। पहाड चिराचिरा परेर ठूलो पहिरो खसेपछि सडक कहिले खुल्छ भन्ने अनिश्चितताले स्थानीय थप चिन्तित छन्।
स्थानीयको माग सुनेपछि मुख्यमन्त्री शाहीले पहिरोबाट भएको क्षतिको विवरण संकलन गरी लागत अनुमान तयार पारेर काम अघि बढाउने प्रतिबद्धता जनाए। उनले भूगर्भविद् ल्याएर प्रभावित क्षेत्रको अध्ययन गराउने र पहिरोको समस्या समाधानका लागि आवश्यक कदम चाल्ने बताए।
