बंगालको खाडीमा विकसित भएको चक्रवात अर्णवको जोखिमलाई ध्यानमा राख्दै जिल्ला प्रशासन कार्यालय मकवानपुरले उच्च सतर्कता अपनाउन जरुरी सूचना जारी गरेको छ। चक्रवातका कारण मकवानपुरसहित बागमती प्रदेशमा भारी वर्षाको सम्भावना रहेको प्रशासनले जनाएको छ।
जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको विशेष बुलेटिनअनुसार कात्तिक १२ गते बिहीबारदेखि कात्तिक १४ गते शनिबारसम्म भारी वर्षा हुन सक्नेछ। वर्षासँगै आकस्मिक बाढी, कटान, डुबान र पहिरोले सडक अवरुद्ध हुने उच्च जोखिम रहेको भन्दै प्रशासनले मंगलबार निर्देशन जारी गरेको हो।
सहायक प्रमुख जिल्ला अधिकारी शेषकान्त पौडेलद्वारा जारी सूचनामा कृषकहरूलाई पाकेको धानबाली तथा अन्य कृषि उपज वर्षाअघि, अर्थात् कात्तिक ११ गते बुधबारभित्र, भित्र्याउन वा वर्षाको अवधिभर नकाट्न र भण्डारण सुरक्षित राख्न अनुरोध गरिएको छ। नदी किनार र चुरे फेदीका बस्तीलाई विशेष सतर्कता अपनाउन तथा वर्षाको अवधिभर खोला तर्ने, माछा मार्ने र दाउरा संकलन नगर्न भनिएको छ।
त्रिभुवन राजपथ, कान्ति लोकपथ, हेटौँडा–काठमाडौं जोड्ने छोटा मार्ग र ग्रामीण सडकमा पहिरोको उच्च जोखिम रहने भएकाले अत्यावश्यक बाहेक लामो दूरी र रात्रिकालीन यात्रा नगर्न प्रशासनले निर्देशन दिएको छ। यात्रा गर्नै परे सडकको अवस्था बुझेर मात्र निस्कन भनिएको छ। बालबालिका, ज्येष्ठ नागरिक, गर्भवती, अपांगता भएका व्यक्ति, बिरामी, चौपाया र महत्त्वपूर्ण कागजात सुरक्षित स्थानमा राख्न पनि भनिएको छ।
सबै स्थानीय तहलाई विपद् प्रतिकार्य संयन्त्र र उद्धार टोली तयार राख्न तथा जोखिमयुक्त बस्तीका परिवारको पूर्वस्थानान्तरणको व्यवस्था मिलाउन भनिएको छ। नेपाली सेना, नेपाल प्रहरी र सशस्त्र प्रहरी बलका टोली खोज तथा उद्धार सामग्रीसहित २४ सै घण्टा तयारी अवस्थामा रहनेछन् भने पहिरो पन्छाउन सडक डिभिजन र स्थानीय तहलाई रणनीतिक स्थानमा एक्साभेटर तथा लोडरजस्ता भारी उपकरण तैनाथ राख्न भनिएको छ।
