लुम्बिनीमा यसपालिको दसैँमा घुम्न आउनेको भीड उल्लेख्य रूपमा बढेको छ। लुम्बिनी विकास कोषले सार्वजनिक गरेको तुलनात्मक विवरणले गत वर्षको दसैँको तुलनामा यस वर्ष पर्यटक आगमन ५४ प्रतिशतले उकालो लागेको देखाएको छ।
कोषको विवरणअनुसार गत वर्ष घटस्थापनादेखि पूर्णिमासम्मको अवधिमा लुम्बिनी पुग्ने पर्यटक २९ हजार ७८७ थिए। यस वर्ष सोही अवधिमा अर्थात् अक्टोबर ११ देखि २५ सम्म त्यो सङ्ख्या ४५ हजार ९३४ पुगेको छ। अघिल्लो वर्षको तुलनामा यसपालि १६ हजार १४७ जना बढी पर्यटक लुम्बिनी आएका हुन्।
वृद्धिमा सबैभन्दा ठूलो हिस्सा भारतीय पर्यटकको छ। गत वर्ष १५ हजार २६६ भारतीय पर्यटक लुम्बिनी आएका थिए भने यस वर्ष २४ हजार ५५७ पुगेका छन्। यो ९ हजार २९१ को वृद्धि हो, प्रतिशतमा ६०.८६ प्रतिशत।
नेपाली पर्यटकको सङ्ख्या झन् तीव्र गतिमा बढेको छ। गत वर्ष ७ हजार ६५६ नेपालीले लुम्बिनी भ्रमण गरेका थिए। यस वर्ष त्यो सङ्ख्या १३ हजार ७०० पुगेको छ, अर्थात् ६ हजार ४४ अर्थात् ७८.९४ प्रतिशतको वृद्धि।
तेस्रो मुलुकबाट आउने पर्यटक पनि बढेका छन्। गत वर्ष ४ हजार ८४० रहेकामा यस वर्ष ५ हजार ६५१ पुगेका छन्, जुन ८११ अर्थात् १६.७६ प्रतिशतको वृद्धि हो।
कोषका सूचना अधिकारी डा हरिध्वज राईले नेपाल र भारत दुवैतर्फ बिदामा घुम्ने चलन बढ्दै गएकाले आगमन बढेको बताएका छन्। अन्य ठाउँमा बाढीपहिरोको जोखिम रहेका बेला लुम्बिनी सुरक्षित गन्तव्यका रूपमा रहेकाले पनि पर्यटक आकर्षित भएको उनको भनाइ छ।
