मलेसिया रोजगारीमा जाने श्रमिकहरूको स्वास्थ्य परीक्षणका क्रममा भएको ठगीसम्बन्धी अनुसन्धानमा प्रहरीको केन्द्रीय अनुसन्धान ब्यूरोले चार जनालाई नियन्त्रणमा लिएको छ। उनीहरूमाथि ठगी र संगठित अपराधको आरोपमा छानबिन भइरहेको छ।
पक्राउ पर्नेहरूमा काठमाडौंको कागेश्वरी मनोहराका ४२ वर्षीय कैलाश खड्का, भक्तपुरको चाँगुनारायणका ४० वर्षीय रवीन्द्र केसी, गोरखाका ४२ वर्षीय प्रवीण तिवारी र सर्लाहीको मलंगवाका ४५ वर्षीय रामपुकार तिवारी छन्। ब्यूरोका प्रवक्ता अनुपम शमशेर जबराका अनुसार सरकारले तोकेको भन्दा बढी शुल्क लिइएको उजुरीका आधारमा उनीहरूलाई पक्राउ गरिएको हो। म्याक्रोटेक प्रालिको नाममा बायो मेडिकल सर्भिस चार्ज भन्दै तोकिएको भन्दा बढी रकम लिइएको आरोप छ। अनुसन्धान अझै सुरुआती चरणमा रहेको उनले बताए।
अनुसन्धान अधिकृतहरूका अनुसार स्वास्थ्य परीक्षणको नाममा ७ लाख ५० हजार ९८८ जना श्रमिकबाट बढी रकम असुल गरिएको छ। त्यसरी उठाइएको रकममध्ये १ अर्ब ६९ करोड २ लाख २४ हजार २६ रुपैयाँ विदेश पठाइएको पाइएको छ। नेपाल राष्ट्र बैंकमा १६ पटक निवेदन दिएर १७ पटक टेलिग्राफिक ट्रान्सफरमार्फत उक्त रकम मलेसियास्थित बेस्टिनेटको बैंक खातामा पुर्याइएको अनुसन्धानमा देखिएको छ। पहिलो रकम सन् २०२० को फेब्रुअरी २७ मा र अन्तिम रकम सन् २०२४ को मे २२ मा पठाइएको थियो।
ब्यूरोले प्रधानमन्त्री कार्यालयको पत्र र जाहेरीका आधारमा अनुसन्धान थालेको हो। यस प्रकरणमा ३६ वटा स्वास्थ्य संस्थाको भूमिका, गैरकानूनी शुल्क असुली र मन्त्रालयबाट छानबिन प्रतिवेदन हराएको विषयमा पनि जाँच भइरहेको छ।
