काठमाडौं — राष्ट्रिय स्वतन्त्र पार्टी (रास्वपा) का महामन्त्री विपिन कुमार आचार्यको नेतृत्वमा २० जना सांसदको टोली कात्तिक २९ गते चीन जाने भएको छ। चिनियाँ कम्युनिस्ट पार्टीको निमन्त्रणामा यो भ्रमण हुन लागेको हो।
भ्रमण टोलीमा सहभागी हुने सांसदहरूको अन्तिम सूची भने तयार भइसकेको छैन। पार्टीभित्र सहभागीहरूको नाम मागिएको छ र नाम छनोट भएपछि मात्रै पार्टीले ती नाम सार्वजनिक गर्ने जनाएको छ।
एक सांसदका अनुसार महामन्त्री आचार्यले सहभागी हुने सांसदहरूको नाम मागेका छन्। भाइटिकाको चार दिनपछि सुरु हुने भ्रमण १० दिनसम्म चल्नेछ। बाँकी विवरणका लागि महामन्त्रीसँगै सम्पर्क गर्न ती सांसदले सुझाएका छन्।
अहिलेसम्म महामन्त्री आचार्यसहित लिमा अधिकारी, हरि ढकाल र समीक्षा बास्कोटा भ्रमणमा सहभागी हुने निश्चित भएको छ। अरू सांसदहरूको सहभागिताबारे भने अझै टुङ्गो लाग्न बाँकी छ।
भ्रमणको एजेन्डाबारे भने अहिलेसम्म केही खुलाइएको छैन। यसअघि पार्टी सभापति रवि लामिछानेको नेतृत्वमा उच्चस्तरीय टोली चीन जाने तयारी भए पनि अन्तिम समयमा त्यो भ्रमण रोकिएको थियो।
निमन्त्रणा चिनियाँ कम्युनिस्ट पार्टीबाट आएको र टोलीको नेतृत्व महामन्त्री आचार्यले गर्ने कुरा निश्चित भए पनि सहभागीहरूको पूरा सूची र भ्रमणका कार्यक्रमबारे पार्टीले थप जानकारी सार्वजनिक गर्न बाँकी नै छ।
