कञ्चनपुरमा मिठाई बेच्ने व्यवसायीले अब आफ्ना उत्पादनमा के–कस्ता कच्चा पदार्थ प्रयोग भएका छन् र मूल्य कति हो भन्ने कुरा ग्राहकले सजिलै देख्ने गरी राख्नुपर्ने भएको छ। जिल्ला प्रशासन कार्यालय कञ्चनपुरले यसबारे स्पष्ट निर्देशन जारी गरेको हो।
सहायक प्रमुख जिल्ला अधिकारी मोहनचन्द्र जोशीले जारी गरेको सूचनामा मिठाईमा प्रयोग हुने तेल तथा घिउको प्रकार, उपभोग्य मिति र मूल्य अनिवार्य रूपमा खुलाउन भनिएको छ। सञ्चालकले कुन–कुन मुख्य कच्चा पदार्थ मिसाएर मिठाई बनाएको हो, कुन तेल वा घिउ प्रयोग भएको हो र कुन मितिसम्म खान मिल्छ भन्ने जानकारी ग्राहकले सजिलै देख्न सक्ने ठाउँमा राख्नुपर्नेछ।
प्रशासनले उपभोक्ताको स्वास्थ्य र हितको रक्षाका लागि यस्तो व्यवस्था गरिएको जनाएको छ। मिठाईलगायत खाद्य पदार्थबारे ग्राहकलाई सुसूचित गराउन सबैले देख्ने गरी कच्चा पदार्थ र मूल्य सूची राख्न आग्रह गरिएको छ। निर्देशन पालना नगरेमा खाद्य स्वच्छता तथा गुणस्तर ऐन, २०८१ अनुसार कारबाही हुने चेतावनी सूचनामा उल्लेख छ, र बुधबारदेखि विवरण नराख्ने व्यवसायीमाथि कारबाही हुने जनाइएको छ।
तिहार तथा छठ पर्वमा अन्य समयको तुलनामा मिठाईको खपत बढी हुने भएकाले प्रशासनले खाद्य स्वच्छतामा विशेष ध्यान दिन व्यवसायीलाई अनुरोध गरेको छ।
