नेपाल प्रिमियर लिगको आगामी संस्करणका लागि सुदूरपश्चिम रोयल्सले श्रीलंकाका अलराउन्डर थरिन्दु रथ्नायकेलाई टोलीमा समावेश गरेको छ। ३० वर्षका रथ्नायकेले लिगको तेस्रो संस्करणमा रोयल्सको जर्सी लगाएर मैदान उत्रनेछन्।
बायाँ हातले ब्याटिङ गर्ने रथ्नायकेको सबैभन्दा चर्चित विशेषता उनको बलिङ हो। उनी दायाँ हातबाट अफ स्पिन र बायाँ हातबाट स्पिन बलिङ गर्न सक्छन्। दुवै हात प्रयोग गर्न सक्ने भएकाले विपक्षी ब्याटरका लागि उनी कठिन चुनौती बन्ने विश्वास गरिएको छ।
रथ्नायकेले श्रीलंकाको राष्ट्रिय टोलीबाट चार टी–२० अन्तर्राष्ट्रिय खेल खेलेका छन्। ती खेलमा उनले ६ विकेट लिएका छन् र ७७ रन बनाएका छन्। अन्तर्राष्ट्रिय टी–२० मा उनको सर्वाधिक स्कोर ६५ रन रहेको छ।
घरेलु तथा अन्य टी–२० प्रतियोगितामा उनको रेकर्ड झनै प्रभावशाली छ। उनले ८८ खेलमा ९८ विकेट लिएका छन् र ६३८ रन बनाएका छन्। एक खेलमा ८ रन खर्चेर ४ विकेट लिनु उनको उत्कृष्ट टी–२० बलिङ प्रदर्शन हो।
लामो ढाँचाको क्रिकेटमा पनि उनको अनुभव उल्लेखनीय छ। प्रथम श्रेणी क्रिकेटमा ८२ खेल खेल्दै उनले ३७८ विकेट लिएका छन् र १ हजार ९२३ रन बनाएका छन्। लिस्ट ए क्रिकेटमा ९६ खेलमा उनले १३३ विकेट र ९५२ रनको प्रदर्शन गरेका छन्। यस्तो अलराउन्ड क्षमता भएका खेलाडी भित्र्याउँदा सुदूरपश्चिमको टोली सन्तुलन बलियो हुने अपेक्षा गरिएको छ।
