अखिल नेपाल फुटबल संघ (एन्फा) का बहुमत कार्यसमिति सदस्यहरूले ललितपुरको सातदोबाटोस्थित मुख्यालय खोल्ने तयारी गरेका छन्। वरिष्ठ उपाध्यक्ष वीरबहादुर खड्काको नेतृत्वमा उनीहरूले कार्यसमितिको बैठक बोलाउने प्रक्रिया अघि बढाएका हुन्। ११ जना सदस्यले लिखित रूपमा बैठकको माग गरे पनि अध्यक्षले बैठक नबोलाएपछि उनीहरू आफैं अघि बढेका हुन्।
एन्फाको विधानको धारा ३१(२) मा कार्यसमितिका एक तिहाइ वा सोभन्दा बढी सदस्यले लिखित माग गरेमा बैठक बोलाउनुपर्ने व्यवस्था छ। सोही व्यवस्थाअनुसार सदस्यहरूले २२ दिनअघि बैठकको माग गरेका थिए। तर अध्यक्ष पंकजविक्रम नेम्बाङले २१ दिनसम्म बैठक नबोलाएको वरिष्ठ उपाध्यक्ष खड्काले बताएका छन्। उनले विधानमा तोकिएको अवधि पर्खिएपछि अब आफ्नो नेतृत्वमा बैठक बोलाएर आवश्यक निर्णय गर्ने बताए।
केन्द्रीय सदस्य टिकाराम लामाका अनुसार सदस्यहरूले मुख्यालयको ताला खोलेर कात्तिक १३ गते बस्ने बैठकका लागि पत्राचार गर्नेछन्। बैठकले सरकार, एसियाली फुटबल महासंघ (एएफसी) र अन्तर्राष्ट्रिय फुटबल महासंघ (फिफा) लाई सहजीकरणका लागि पत्र लेख्ने उनले बताए। फुटबल प्रशासनमा देखिएको विवाद समाधान गर्न बैठक महत्त्वपूर्ण हुने अपेक्षा गरिएको छ।
अध्यक्ष नेम्बाङ, महासचिव किरण राई, कोषाध्यक्ष रविन्द्र जोशी र लेखापाल सन्जीव पाण्डेविरुद्ध खेल मिलेमतो र ठगीसम्बन्धी मुद्दा चलेको छ। उक्त मुद्दा केन्द्रीय अनुसन्धान ब्युरोको सिफारिसमा ललितपुर जिल्ला सरकारी वकिल कार्यालयले चलाएको हो। जोशी र पाण्डे धरौटीमा छुटेका छन् भने नेम्बाङ र राई अदालतमा उपस्थित भएका छैनन्। तेस्रो पक्षको हस्तक्षेप भएको भन्दै फिफाले २४ जुनदेखि एन्फालाई निलम्बनमा राखेको छ।
