केही समयअघिसम्म पोखराका मुख्य सडकमा गुजुल्टिएका र लत्रेका तार तथा जीर्ण पोलले सहरको सौन्दर्य बिगारेका थिए। दुर्घटनाको जोखिम पनि उत्तिकै थियो। अहिले भने ती ठाउँको दृश्य फेरिएको छ। अस्तव्यस्त पोल र तार हटेपछि सडक खुला देखिएको छ र तारको जञ्जालबाट हिमाल हेर्नुपर्ने बाध्यता हटेको छ।
नेपाल विद्युत् प्राधिकरणले चार वर्षअघि तार भूमिगत गर्न थालेपछि पोखराको मुख्य सहरी क्षेत्र तारमुक्त हुँदै गएको हो। पोखरा–भरतपुर वितरण प्रणाली सुदृढीकरण आयोजनाअन्तर्गत पोखरामा २२३ किलोमिटर क्षेत्रमा तार जमिनमुनि बिछ्याउने काम भइरहेको छ। आयोजनाका प्रमुख इन्जिनियर आनन्द सुवेदीका अनुसार १६५.७ किलोमिटर तार बिछ्याइसकिएको छ भने ५५.२ किलोमिटरमा विद्युत् प्रवाह भइसकेको छ।
आयोजनाको भौतिक प्रगति ८२ प्रतिशत पुगेको र आउँदो वैशाखभित्र काम सक्ने लक्ष्य रहेको सुवेदीले बताए। छ हजार घरमा भूमिगत प्रणालीबाट विद्युत् सेवा पुर्याइनेछ। पृथ्वी राजमार्ग क्षेत्रका ४०० भन्दा बढी घरमा यो सेवा पुगिसकेको छ। सेती पुलदेखि पृथ्वीचोक हुँदै लेकसाइड जोड्ने मुख्य सडकमा तार बिछ्याउने काम सकिएको छ भने लेकसाइडका भित्री सडकमा बिजुली जोड्न मात्र बाँकी छ।
आयोजनामा रु एक अर्ब ७० करोड खर्च हुनेछ। सन् २०२२ को जनवरीमा भारतीय कम्पनी टाटा प्रोजेक्ट्सले ठेक्का पाएको थियो। भरतपुरमा ९५ प्रतिशत काम सकिएको र दुवै सहर गरी कुल प्रगति ८८ प्रतिशत पुगेको सुवेदीले बताए। जीर्ण पोल र तार हट्दा दुर्घटनाको जोखिम घट्ने जिल्ला ट्राफिक कार्यालय कास्कीका प्रमुख सुजितकुमार देवकोटाले बताए।
