चितवन, ११ कात्तिक । दशैंको अवधिमा चितवन राष्ट्रिय निकुञ्ज घुम्न पुग्ने पर्यटकको सङ्ख्या २० हजार नाघेको छ । निकुञ्ज कार्यालयको तथ्याङ्कअनुसार घटस्थापनादेखि कात्तिक ८ गते पूर्णिमासम्मको अवधिमा २० हजार ८७ जनाले निकुञ्जको भ्रमण गरेका हुन् ।
यही अवधिमा पर्यटकबाट एक करोड ७३ लाख ४४ हजार ६५० रुपैयाँ राजस्व संकलन भएको छ । निकुञ्जका संरक्षण अधिकृत गणेशप्रसाद तिवारीका अनुसार भ्रमण गर्ने पर्यटकमा ११ हजार ८९१ नेपाली, ८३१ सार्क मुलुकका नागरिक र सात हजार तीन सय ६५ तेस्रो मुलुकका विदेशी रहेका छन् ।
निकुञ्जको तथ्याङ्कले सबैभन्दा बढी पर्यटक सौराहा क्षेत्रबाट जीप सफारीमार्फत निकुञ्जभित्र प्रवेश गरेको देखाएको छ । दशैंको टीका लगत्तै सौराहाबाट जाने नेपाली पर्यटकको सङ्ख्या उल्लेख्य रूपमा बढेको थियो । सौराहा पोस्टबाट कात्तिक ६ गते दुई हजार ३७, कात्तिक ७ गते दुई हजार ८६ र कात्तिक ८ गते एक हजार सात सय १३ नेपाली पर्यटक निकुञ्ज घुम्न गएका थिए ।
निकुञ्ज प्रवेशका लागि नेपाली पर्यटकसँग एक सय ५०, सार्क मुलुकका पर्यटकसँग एक हजार र तेस्रो मुलुकका पर्यटकसँग दुई हजार रुपैयाँ शुल्क लिइने गरिएको छ । जीप सफारीमा एकपटक जाँदा पाँच हजार रुपैयाँ लाग्ने व्यवस्था छ ।
जंगली जनावर र विभिन्न प्रजातिका चराचुरुङ्गी हेर्न, राप्ती नदीमा डुंगा सयर गर्न र थारु संस्कृतिमा रमाउन पर्यटक चितवन पुग्ने गरेका छन् । निकुञ्जभित्र जीप सफारी, हात्ती सफारी र डुंगा सफारी मुख्य आकर्षण हुन् । सौराहासहित मेघौली, पटिहानी र जगतपुरमा पनि दशैंमा स्वदेशी तथा विदेशी पर्यटकको उल्लेख्य उपस्थिति रहेको व्यवसायीहरूले बताएका छन् । गत आर्थिक वर्ष २०८२/०८३ मा निकुञ्जमा दुई लाख ७२ हजार नौ सय २३ पर्यटक पुगेका थिए ।
