ललितपुरमा पदार्थ विज्ञानसम्बन्धी छैटौँ अन्तर्राष्ट्रिय सम्मेलन सुरु भएको छ। मंगलबारदेखि सुरु भएको चार दिने कार्यक्रम कुपण्डोलस्थित नेसनल इन्स्टिच्युट अफ इन्जिनियरिङ एन्ड टेक्नोलोजीमा भइरहेको छ। राष्ट्रिय योजना आयोगका सदस्य प्रा.डा. सुदन झाले सम्मेलनको उद्घाटन गरेका हुन्।
नेपाल पोलिमर इन्स्टिच्युट, त्रिभुवन विश्वविद्यालयको इन्जिनियरिङ अध्ययन संस्थानअन्तर्गतको पश्चिमाञ्चल क्याम्पस र नेसनल इन्स्टिच्युट अफ इन्जिनियरिङ एन्ड टेक्नोलोजीले संयुक्त रूपमा आयोजना गरेको सम्मेलनलाई विश्वविद्यालय अनुदान आयोगले सहयोग गरेको छ।
सम्मेलनमा १४३ वटा अनुसन्धानमूलक कार्यपत्र प्रस्तुत हुँदैछन्। तीमध्ये पाँचवटा प्रमुख सम्बोधन, ३५ वटा आमन्त्रित कार्यपत्र, छवटा विषयगत व्याख्यान र २७ वटा अनुसन्धान प्रस्तुति छन्। मौखिक प्रस्तुतिको संख्या ७३ पुग्छ। नवोदित वैज्ञानिकका ७० वटा पोस्टर शोधपत्र पनि प्रदर्शनमा राखिएका छन्।
उद्घाटनपछि प्रा.डा. रामेश्वर अधिकारीको अध्यक्षतामा दिगो भविष्यका लागि स्मार्ट तथा बहुउपयोगी पदार्थ विषयमा विशेष सत्र चलेको संयोजक डा. हरिशरण अधिकारीले बताए। नेपालसँगै भारत, अमेरिका, जापान, रुस, जर्मनी र अस्ट्रेलियाका वैज्ञानिक सहभागी छन्। सहसंयोजक डा. शङ्कर खतिवडाका अनुसार सहभागीहरूले न्यानो प्रविधि, जैविक प्रविधि, हरित ऊर्जा, ऊर्जा भण्डारण, सिमुलेसन र जैविक पदार्थसम्बन्धी नयाँ खोज प्रस्तुत गर्नेछन्।
सम्मेलनमा युवा वैज्ञानिकको भूमिका, दिगो सहरका प्रविधि र बाँसजस्ता स्थानीय स्रोतलाई आधुनिक विज्ञानसँग जोड्ने विषयमा तीनवटा गोलमेच छलफल पनि हुनेछन्। उत्कृष्ट शोध र पोस्टर प्रस्तुतकर्तालाई पुरस्कार दिइनेछ। समापनपछि सहभागीलाई मकवानपुरको चित्लाङस्थित मदन भण्डारी विज्ञान तथा प्रविधि विश्वविद्यालयको भ्रमण गराइने सहसंयोजक डा. केदार ढकालले बताए। अक्टोबर २८ देखि ३१ सम्म चल्ने सम्मेलनले नेपालमा अनुसन्धान र अन्तर्राष्ट्रिय सहकार्य बढाउने आयोजकको अपेक्षा छ।
