भन्सार विभागले सार्वजनिक गरेको विवरणले चालु आर्थिक वर्षको सुरुआती तीन महिनामा मुलुकको बाह्य व्यापार उल्लेख्य रूपमा विस्तार भएको देखाएको छ। साउनदेखि असोजसम्मको अवधिमा आयात र निर्यात जोड्दा बनेको कुल कारोबार अघिल्लो वर्षको यही अवधिको तुलनामा ४० दशमलव ७१ प्रतिशतले बढेको हो। यससँगै कुल कारोबारको आकार ७ खर्ब ६१ अर्ब ७ करोड रुपैयाँ पुगेको छ।

यस अवधिको सबैभन्दा सकारात्मक पक्ष निर्यातमा देखिएको तीव्र सुधार हो। निर्यात ५७ दशमलव शून्य ३ प्रतिशतले बढेर १ खर्ब १४ अर्ब २८ करोड रुपैयाँ पुगेको छ, जबकि गत वर्ष सोही अवधिमा ७२ अर्ब ७८ करोड रुपैयाँ बराबरको सामान विदेशिएको थियो। निर्यात बढेसँगै कुल व्यापारमा त्यसको अंश १३ दशमलव ४६ प्रतिशतबाट १५ दशमलव शून्य २ प्रतिशत पुगेको छ।

तर, आयातको वृद्धिले व्यापार घाटा पनि बढाएको छ। तीन महिनामा ६ खर्ब ४६ अर्ब ७८ करोड रुपैयाँ बराबरको वस्तु भित्रिएको छ, जुन अघिल्लो वर्षको ४ खर्ब ६८ अर्ब ८ करोड रुपैयाँभन्दा ३८ दशमलव १८ प्रतिशत बढी हो। कुल व्यापारमा आयातको हिस्सा भने ८६ दशमलव ५४ प्रतिशतबाट घटेर ८४ दशमलव ९८ प्रतिशतमा झरेको छ।

आयातको भार बढ्दा व्यापार घाटा ३४ दशमलव ७१ प्रतिशतले बढेर ५ खर्ब ३२ अर्ब ४९ करोड रुपैयाँ पुगेको छ। गत वर्ष यही अवधिमा घाटा ३ खर्ब ९५ अर्ब ३० करोड रुपैयाँ थियो। यद्यपि, आयात–निर्यात अनुपातमा केही सुधार देखिएको छ। अघिल्लो वर्ष एक रुपैयाँ निर्यात हुँदा ६ रुपैयाँ ४३ पैसाको आयात हुने गरेकोमा यस वर्ष त्यो अनुपात १२ प्रतिशतले घटेर ५ रुपैयाँ ६६ पैसामा झरेको छ।