रामशाहपथमा सिंहदरबारको ठीक अगाडि रहेको स्वास्थ्य तथा जनसंख्या मन्त्रालयको पुरानो भवन आगलागीपछि जस्तो अवस्थामा पुगेको थियो, आज पनि उस्तै देखिन्छ। भदौ २४ गते, आन्दोलनको दोस्रो दिन, उक्त भवनमा आगो लगाइएको थियो। त्यसयता भवन प्रयोगमा आएको छैन।
भवनको वरिपरि अहिले झारपात उम्रिएको छ भने भित्र जलेका फर्निचर, क्षतिग्रस्त सामग्री र आगोका अवशेष देख्न सकिन्छ। आगलागीले भवनको भित्री संरचनामा गम्भीर क्षति पुर्याएको थियो। फर्निचर, कम्प्युटर, कागजात र अन्य सामग्री नष्ट भएका थिए भने परिसरमा रहेका सवारीसाधनमा समेत क्षति पुगेको थियो।
आन्दोलनलगत्तै नेपाल इन्जिनियर्स एसोसिएसन र सहरी विकास तथा भवन निर्माण विभागको समन्वयमा गरिएको प्राविधिक निरीक्षणले भवनलाई पुनः प्रयोग गर्न नसकिने निष्कर्ष निकालेको थियो। तर अहिलेसम्म जलेको संरचना हटाइएको छैन र क्षतिग्रस्त सामग्रीको व्यवस्थापन पनि पूरा भएको छैन।
मन्त्रालयले सुरुमा नेपाल स्वास्थ्य अनुसन्धान परिषद्को भवनबाट काम गरेको थियो। पछि सिंहदरबारभित्रका अस्थायी संरचना र अन्य कार्यालयबाट नियमित काम हुँदै आएको छ। आन्दोलनका क्रममा सिंहदरबार, संघीय संसद् भवन र सर्वोच्च अदालतलगायत देशभरका थुप्रै सरकारी तथा निजी संरचनामा आगजनी र तोडफोड भएका थिए।
क्षतिबारे अध्ययन गरेको सरकारी समितिको प्रतिवेदनअनुसार २,६७१ वटा भवनमा क्षति पुगेको थियो। ती भवनमा मात्रै ३९ अर्ब ३१ करोड ७५ लाख रुपैयाँ बराबरको क्षति भएको थियो भने कुल भौतिक क्षति ८४ अर्ब ४५ करोड ७७ लाख रुपैयाँ पुगेको थियो। पुरानो भवन हटाउने, त्यही ठाउँमा नयाँ भवन बनाउने वा जग्गालाई अन्य प्रयोजनमा ल्याउने विषयमा भने अहिलेसम्म कुनै स्पष्ट सार्वजनिक कार्यतालिका आएको छैन।
