मोरङको कानेपोखरी गाउँपालिका–7 स्थित बरगाछीमा स्वास्थ्य शिविर सञ्चालन गरिरहेका १० जना विदेशी नागरिकको कागजात जफत गरिएको छ। पर्यटक भिसामा नेपाल आएर आवश्यक अनुमति नलिई शिविर चलाएको आरोपमा उनीहरूमाथि कारबाही प्रक्रिया अघि बढाइएको हो। जफत गरिएका राहदानीलगायत कागजात थप कारबाहीका लागि अध्यागमन विभागमा पठाइएको छ।

शिविर आयोजना गर्ने संस्थाको नाम मर्सी डेभलपमेन्ट बताइएको छ। उक्त संस्थालाई क्रिश्चियन धार्मिक गतिविधिमा संलग्न रहेको भनिएको छ। शिविरमा विदेशी चिकित्सकसहितका नागरिक सहभागी भएका थिए। विदेशी नागरिक अनुगमन जिल्ला समितिको निर्णयका आधारमा कागजात विभागमा पठाइएको हो।

शिविर कात्तिक ८ गतेदेखि चार दिनसम्म सञ्चालन गर्ने गरी सुरु गरिएको थियो। यसको तयारी पास्टर पावेल दङ्गालले गरेका थिए। सहभागीमध्ये तीन जना ब्राजिलका, दुई जना क्यानडाका र पाँच जना अमेरिकी नागरिक रहेको गृह मन्त्रालयले जनाएको छ। उनीहरू सन् २०२६ को अक्टोबर २२ र २३ मा नेपाल प्रवेश गरेका थिए। विवरणमा उनीहरूको भिसाको म्याद नोभेम्बर ६ देखि २१ सम्म रहेको उल्लेख छ।

शिविर सञ्चालन भएको जग्गामा अस्पताल निर्माण गर्ने उद्देश्यले भवन बनाइएको बताइएको छ। स्थानीय किराना व्यवसायी नवराज श्रेष्ठले तीन कट्ठा जग्गामा छ वटा साना–ठूला भवन निर्माण गरेका थिए। ती भवनमा धार्मिक गतिविधि तथा अन्य कार्यक्रम सञ्चालन हुँदै आएको बताइएको छ। सो स्थानमा धार्मिक गतिविधिबारे विवाद सुरु भएपछि स्थानीयलाई खुसी पार्न शिविर आयोजना गरिएको जनाइएको छ। हाल त्यहाँ दुई जना पास्टर र केही सिलाइकटाइ प्रशिक्षक बस्दै आएको पाइएको छ।