राष्ट्रिय स्वतन्त्र पार्टीले आगामी स्थानीय तहको निर्वाचनका लागि उम्मेदवार बन्न चाहनेहरूबाट मागेको आवेदनमा कार्यकारी पदप्रति बढी आकर्षण देखिएको छ भने वडा सदस्यजस्ता पदमा भने चासो कम देखिएको छ। पार्टीले गाउँपालिकाका लागि भदौ १ र नगरपालिकाका लागि असोज २९ देखि आवेदन खुला गरेको थियो। उम्मेदवार क्लबमा नाम दर्ता गर्न कुनै अन्तिम मिति तोकिएको छैन।
पार्टीका अनुसार सात किसिमका पदका लागि आवेदन आह्वान गरिएको छ। तीमध्ये पालिका प्रमुख र अध्यक्ष पदमा सबैभन्दा धेरै आवेदन परेका छन्। उपप्रमुख, उपाध्यक्ष र वडाध्यक्षमा त्यसपछि आवेदन आएको छ। वडा सदस्यका लागि भने अपेक्षाअनुसार आवेदन परेको छैन।
महामन्त्री विपिन आचार्यले कतिपय पालिकामा सदस्य पदका लागि आवश्यक संख्याभन्दा कम आवेदन परेको बताए। समयसीमा नतोकिएकाले पनि यस्तो भएको हुन सक्ने उनको भनाइ छ। तिहारपछि पनि आवेदन दिन सकिने भएकाले अहिले नै अन्तिम निष्कर्ष निकाल्न नसकिने उनले बताए। उम्मेदवार छनोट समितिको बिहीबारको बैठकले समयसीमाबारे थप निर्णय गर्ने उनले जानकारी दिए।
प्रवक्ता जगदीश खरेलले पनि प्रमुख पदमा आवेदन बढी र सदस्यमा कम भएको पुष्टि गरे। गण्डकी प्रदेश सभापति नवीन त्रिपाठीका अनुसार प्रदेशका ५८ गाउँपालिकामा अध्यक्ष पदका लागि २०६ जनाले आवेदन दिएका छन् भने मनाङ र मुस्ताङमा हालसम्म कुनै आवेदन परेको छैन। हाल ४६० गाउँपालिका र २७६ नगरपालिकाका लागि आवेदन खुला गरिएको छ। उपमहानगर र महानगरका लागि भने आवेदन मागिएको छैन।
पहिलो पटक स्थानीय चुनाव लड्न लागेको पार्टीले उम्मेदवार छनोटका लागि छुट्टै विधि तयार पारेको छ। प्रारम्भिक निर्वाचनलाई ४०, राजनीतिक निकटतालाई २५, नेतृत्व एकेडेमीलाई २५ र समावेशितालाई १० प्रतिशत भार दिइएको छ।
