काठमाडौं । नेपाल प्रिमियर लिगमा सुरुवाती हारपछि सुदूरपश्चिम रोयल्सले जितको बाटो समातेको छ । टोलीका ब्याटर इशान पाण्डेले हारजित खेलको स्वाभाविक पाटो भएको बताउँदै पहिलो खेलको हारलाई पछाडि छाडेर अघि बढ्नु महत्त्वपूर्ण रहेको संकेत गरेका छन् ।
तेस्रो संस्करणको प्रतियोगितामा सुदूरपश्चिमले पहिलो खेलमा लुम्बिनी लायन्ससँग १९ रनको हार बेहोरेको थियो । उक्त खेलमा टोलीको ब्याटिङ चल्न सकेको थिएन । तर दोस्रो खेलमा पोखरा एभेन्जर्सलाई ६ विकेटले हराउँदै सुदूरपश्चिमले पुनरागमन गर्यो ।
पोखराविरुद्धको जितमा इशानको भूमिका महत्त्वपूर्ण रह्यो । उनले ३१ बलमा ३७ रन बनाए । कप्तान दीपेन्द्रसिंह ऐरीसँगको साझेदारीले जितको जग बसाल्यो । दीपेन्द्रले अविजित ५१ रन बनाएपछि सुदूरपश्चिमले १४६ रनको लक्ष्य १६ ओभर ५ बलमै पूरा गरेको थियो ।
इशानले खेलमा उतारचढाव आइरहने र एउटा हारले टोलीको लक्ष्य नबदलिने बताएका छन् । पहिलो खेलको अनुभवलाई उनले ‘दशा कटेजस्तै’ भएको रूपमा व्याख्या गरेका छन् ।
गत संस्करणको उपविजेता सुदूरपश्चिम यसपटक पनि उपाधिका दाबेदारका रूपमा हेरिएको छ । सुरुवाती हारपछि निकालिएको जितले टोलीले आफ्नो लय समात्ने संकेत गरेको छ ।
