यमनको उत्तरी अल-जौफ प्रान्तमा बुधबार गरिएको हवाई हमलामा कम्तीमा १४ जनाको ज्यान गएको छ भने १० जना घाइते भएका छन्। हुथी विद्रोहीद्वारा सञ्चालित अल-मसिराह टेलिभिजनले हमलापछि सार्वजनिक गरेको विवरणमा हताहतीको यो संख्या उल्लेख गरिएको हो।
टेलिभिजनका अनुसार प्रान्तीय राजधानी अल-हाज्ममा रहेको एउटा सार्वजनिक बजारलाई पटकपटक निशाना बनाइएको थियो। बजार नजिकै रहेको अल-तैसीर इन्धन केन्द्रमा पनि छुट्टै हमला भएको थियो। दुवै ठाउँमा सर्वसाधारणले ज्यान गुमाएको र घाइते भएको विवरणमा जनाइएको छ।
सुरुमा १२ जनाको मृत्यु भएको बताइएको थियो। पछि मृतकको संख्या बढेर १४ पुगेको टेलिभिजनले जनाएको छ। ज्यान गुमाउने र घाइते हुनेमा महिला र बालबालिका पनि रहेको बताइएको छ। हताहतीको संख्या अझै बढ्न सक्ने आशंका पनि व्यक्त गरिएको छ। तर, हताहतीसम्बन्धी विवरण स्वतन्त्र स्रोतबाट पुष्टि हुन सकेको छैन। यस विषयमा साउदी अरबले तत्काल कुनै धारणा सार्वजनिक गरेको छैन।
हुथी विद्रोही र साउदी अरबबीच सीमापार हमला जारी रहेका बेला यो घटना भएको हो। सोही समयमा हुथी लडाकु र साउदी समर्थित यमनी सरकारी सेनाबीच विभिन्न स्थानमा चर्को लडाइँ भइरहेको छ।
सन् २०१४ को अन्त्यतिर हुथी विद्रोहीले राजधानी साना र उत्तरी यमनका धेरै भूभाग नियन्त्रणमा लिएपछि देश द्वन्द्वमा फसेको थियो। त्यसपछि यमनी सरकारको साथमा उभिँदै साउदी अरबको नेतृत्वमा रहेको गठबन्धनले सन् २०१५ मा द्वन्द्वमा हस्तक्षेप गरेको थियो।
