काठमाडौं । कृषि फार्मका लागि सहुलियत अनुदान मिलाइदिने प्रलोभन देखाएर ५ करोड ८० लाख रुपैयाँ ठगी गरेको आरोपमा दुई जनालाई नेपाल प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको छ। उनीहरूले सिंहदरबारस्थित विभिन्न मन्त्रालयका कर्मचारीसँग राम्रो चिनजान रहेको भन्दै सर्वसाधारणलाई अनुदान सहजै मिलाइदिने विश्वास दिलाएका थिए।
पक्राउ पर्नेमा काठमाडौं महानगरपालिका–१३ ताहाचल बस्ने ५२ वर्षीय तिलक बुढाथोकी भन्ने श्रीकृष्ण महर्जन र ललितपुर महानगरपालिका–१४ नखिपोट बस्ने ६० वर्षीय प्रेम नारायण खनाल छन्। जालिम सिंह महतोले दिएको जाहेरीका आधारमा उनीहरूलाई पक्राउ गरिएको प्रहरीले जनाएको छ।
सीआईबीका अनुसार आरोपीहरूले कृषि अनुदान मिलाइदिने भन्दै पीडितहरूलाई विभिन्न बहाना बनाएर पटक–पटक गरी कुल ५ करोड ८० लाख रुपैयाँ लिएका थिए। नेपाल सरकार वादी रहेको ठगीसम्बन्धी मुद्दामा पुजा खड्गीसहित अन्यलाई प्रतिवादी बनाइएको छ।
पक्राउ परेका दुवै जनालाई काठमाडौं जिल्ला अदालतमा उपस्थित गराई अनुसन्धानका लागि म्याद थप गरिएको छ। सीआईबीका सह–प्रवक्ता तथा सूचना अधिकारी प्रहरी उपरीक्षक योगेन्द्र कुमार खड्काले अदालतबाट म्याद थप भएसँगै यस प्रकरणमा थप अनुसन्धान तीव्र रूपमा अघि बढाइएको बिहीबार जानकारी दिए। अनुसन्धानका क्रममा ठगीमा संलग्न अन्य व्यक्ति र रकमको थप विवरण खुल्न सक्ने प्रहरीले जनाएको छ।
