नेपाली कांग्रेसको १५औँ महाधिवेशनबाट निर्वाचित नयाँ केन्द्रीय कार्यसमितिले बिहीबारदेखि पार्टी सञ्चालनको औपचारिक जिम्मेवारी सम्हालेको छ। सभापति गगन थापाले ललितपुरको सानेपास्थित पार्टीको केन्द्रीय कार्यालय बीपी स्मृति भवनमा आयोजित समारोहमा नवनिर्वाचित पदाधिकारी तथा केन्द्रीय सदस्यहरूलाई पद र गोपनीयताको शपथ दिलाएका हुन्।
केन्द्रीय निर्वाचन समितिका सदस्य सचिव अधिवक्ता राजु कटुवालका अनुसार यसपटकको कार्यक्रम विगतभन्दा फरक ढाँचामा गरिएको थियो। नवनिर्वाचित नेताहरूलाई प्रमाणपत्र दिने कामसँगै पदबहाली गराउने व्यवस्था मिलाइएको उनले जानकारी दिए। सभापति थापाले असोज ३१ गते नै शपथ लिइसकेकाले बिहीबार सभापतिबाहेकका अन्य पदाधिकारी र केन्द्रीय सदस्यहरूले शपथ लिएका हुन्।
गत असोज १८ देखि २३ गतेसम्म काठमाडौँमा महाधिवेशन सम्पन्न भएको थियो। निर्वाचनको अन्तिम नतिजा असोज ३० गते सार्वजनिक भएको थियो। महाधिवेशनमा थापा ९४ प्रतिशत मतसहित सभापतिमा निर्वाचित भएका थिए। वरिष्ठ उपसभापतिमा विश्वप्रकाश शर्मा, खुला उपसभापतिमा चन्द्रकान्त भण्डारी र मधु आचार्य, महिला उपसभापतिमा पुष्पा भुसाल तथा समावेशी उपसभापतिमा विनोद चौधरी निर्वाचित भएका थिए। महामन्त्रीमा प्रदीप पौडेल, उदयशमशेर जबरा र डिला संग्रौला निर्वाचित भएका थिए।
निर्वाचन समितिका अनुसार यसपटक सात हजार ३९२ मतदाताको मतगणना एक सातामा सम्पन्न भएको थियो। कुल २२९ पदका लागि भएको निर्वाचनमा झण्डै एक लाख ६२ हजार मतपत्र गणना गरिएको थियो।
