क्रिस्टियानो रोनाल्डोले साउदी प्रो लिगमा अल खालोदविरुद्ध दोस्रो हाफमा १५ मिनेटभित्रै तीन गोल गर्दै अल नासरलाई ५–३ को जित दिलाएका छन्। अल–अव्वल पार्कमा बिहीबार भएको खेलमा उनले ६६औं, ७२औं र ८१औं मिनेटमा गोल गरे। यो उनको करियरको ६७औं ह्याट्रिक हो भने अल नासरका लागि पहिलो पटक ९०८ दिनपछि तीन गोल गरेको खेल हो।
पहिलो हाफ २–२ को बराबरीमा सकिएको थियो। अल नासरका लागि एन्जेलोले २४औं र साडियो मानेले ३८औं मिनेटमा गोल गरेका थिए। रोनाल्डोका पहिलो हाफका दुई गोल भिडियो सहायक रेफ्रीले अफसाइडका कारण बदर गरिदिएका थिए। दोस्रो हाफमा भने उनी रोकिएनन्। जोआओ फेलिक्सको पासमा ६६औं मिनेटमा उनले नजिकबाट बल जाली चुमाए, त्यसको ६ मिनेटपछि फेरि फेलिक्सकै सहयोगमा हेडरमार्फत दोस्रो गोल गरे। ८१औं मिनेटमा मानेको पासमा तेस्रो गोल गर्दै ह्याट्रिक पूरा गरे।
अल खालोदका लागि जुलियन डोमिङ्गेजले दुई र एन्टोइन एसोम्बाले एक गोल गरे। अन्तिम समयमा डोमिङ्गेजको पेनाल्टीले अन्तर ५–३ मा झार्यो। जितसँगै अल नासर २८ अंकसहित शीर्ष स्थानको अल कादसियासँग बराबरीमा पुगेको छ, तर उसले एक खेल कम खेलेको छ।
यो ह्याट्रिकसँगै रोनाल्डोको करियर गोलसंख्या ९८५ पुगेको छ। अब उनी ऐतिहासिक एक हजार गोलको कोसेढुंगाबाट मात्र १५ गोल टाढा छन्। अल नासरका लागि उनको पछिल्लो ह्याट्रिक सन् २०२४ मे ४ मा अल वेहदाविरुद्ध भएको थियो। ४१ वर्षीय पोर्चुगल कप्तानले रियल म्याड्रिडका लागि ४५०, पोर्चुगलका लागि १४६, म्यानचेस्टर युनाइटेडका लागि १४५ र अल नासरका लागि १३८ गोल गरेका छन्।
