काठमाडौँ — डेभलपमेन्ट बैंकर्स एसोसिएसन नेपालको अध्यक्षमा कामना सेवा विकास बैंकका प्रमुख कार्यकारी अधिकृत दिनेश थकाली सर्वसम्मत रूपमा चयन भएका छन्।
एसोसिएसनको २१औँ वार्षिक साधारण सभाले थकालीको नेतृत्वमा आगामी दुई वर्षका लागि ९ सदस्यीय नयाँ कार्यसमिति निर्विरोध निर्वाचित गरेको हो।
थकाली अनुभवी चार्टर्ड एकाउन्टेन्ट तथा बैंकर हुन्। बैंकिङ क्षेत्रमा नेतृत्वदायी भूमिका निर्वाह गर्दै आएका उनले वित्तीय कार्यसम्पादन, संस्थागत सुधार, डिजिटल रूपान्तरण, जोखिम व्यवस्थापन तथा सुशासनको क्षेत्रमा लामो अनुभव बटुलेका छन्।
सङ्घको उपाध्यक्षमा गरिमा विकास बैंकका प्रमुख कार्यकारी अधिकृत माधव प्रसाद उपाध्याय, सचिवमा ज्योति विकास बैंकका प्रमुख कार्यकारी अधिकृत कपिल ढकाल र कोषाध्यक्षमा महालक्ष्मी विकास बैंकका प्रमुख कार्यकारी अधिकृत दिपेश लम्साल रहेका छन्।
सदस्यहरूमा मुक्तिनाथ विकास बैंकका तारा मानन्धर, लुम्बिनी विकास बैंकका सुमन आचार्य, सांग्रिला डेभलपमेन्ट बैंकका रविन सिजापति, ग्रीन डेभलपमेन्ट बैंकका हरिबहादुर बुढाथोकी र मितेरी डेभलपमेन्ट बैंकका अनन्त कुमार चापागाईं छन्।
सभाले आर्थिक वर्ष २०८२/८३ को वार्षिक प्रतिवेदन, वासलात, नाफा–नोक्सान हिसाब तथा नगद प्रवाह विवरणलगायत वित्तीय विवरण छलफल गरी पारित गरेको छ। आर्थिक वर्ष २०८३/८४ का लागि लेखापरीक्षक नियुक्ति तथा पारिश्रमिकको प्रस्ताव पनि स्वीकृत भएको छ।
पदभार ग्रहण गर्दै थकालीले बैंकिङ क्षेत्रका समसामयिक मुद्दामा प्रभावकारी रूपमा अगाडि बढ्ने प्रतिबद्धता जनाए। उनले सुशासन, जोखिम व्यवस्थापन, प्रविधि तथा मानव संसाधनको क्षमता अभिवृद्धि, डिजिटल रूपान्तरण, कर्जा गुणस्तर तथा असुली सुधार र सदस्य बैंकहरूबीच उत्कृष्ट अभ्यासको आदानप्रदानमा जोड दिनुपर्ने बताए।
हाल नेपालमा १७ वटा विकास बैंक सञ्चालनमा छन्, जसमध्ये ८ वटा राष्ट्रिय र ९ वटा क्षेत्रीय स्तरका छन्। २०८१ असार मसान्तसम्ममा विकास बैंकहरूले १ हजार ११२ शाखा र ३३६ एटीएममार्फत करिब ८० लाख ग्राहकलाई बैंकिङ सेवा दिँदै आएका छन्।
