काठमाडौं । राष्ट्रिय प्रजातन्त्र पार्टी (राप्रपा) की सांसद खुश्बु ओलीले पत्रकार र सञ्चारगृहलाई निशाना बनाउने काम भएको भन्दै सरकारमाथि प्रश्न उठाएकी छन् ।
शुक्रबार सामाजिक सञ्जालमार्फत धारणा सार्वजनिक गर्दै ओलीले प्रश्न सोध्ने पत्रकार पक्राउ पर्नु र आलोचनात्मक चेत राख्ने सञ्चारगृह निशानामा पर्नु चिन्ताजनक भएको बताएकी हुन् ।
अब सरकारको परिभाषामा लोकतन्त्र भनेको ताली बजाउने व्यवस्था मात्रै हो ? प्रेस स्वतन्त्रता पनि सरकारको अनुमतिमा चल्नुपर्ने हो ? पत्रकारको कलम बन्द गरेर सुशासनको नारा लगाउनु लोकतन्त्रको कुन नयाँ संस्करण हो सरकार ? उनले प्रश्न गरेकी छन् ।
उनले विधिको शासन र शासनको विधिबारे समेत प्रश्न उठाउँदै पत्रकारको गिरफ्तारी र सञ्चारगृहमाथिको हस्तक्षेपप्रति आपत्ति जनाएकी छन् ।
पछिल्ला दिनमा समाचार लेखेकै आधारमा पत्रकारहरू पक्राउ परेका छन् भने समाचारको स्रोत खोज्न सञ्चारगृहमा प्रहरी प्रवेश गरेको छ । यस्ता घटनाप्रति विभिन्न दल र पत्रकारसम्बद्ध संस्थाहरूले विरोध जनाउँदै पक्राउ परेका पत्रकारको रिहाइ र प्रेसमाथिको हस्तक्षेप बन्द गर्न माग गरिरहेका छन् ।
