काठमाडौं । राष्ट्रिय प्रजातन्त्र पार्टी (राप्रपा) का प्रवक्ता मोहन श्रेष्ठले समाचारको स्रोत खुलाउन पत्रकारलाई दबाब दिने, धम्क्याउने तथा प्रहरी लगाएर पक्राउ गर्ने कार्यप्रति आपत्ति जनाएका छन् ।
पत्रकारले निर्भीकतापूर्वक काम गर्न पाउने वातावरण सुनिश्चित गर्नु सरकारको दायित्व भएको बताउँदै श्रेष्ठले पत्रकारको हुर्मत लिने, धम्क्याउने र स्वतन्त्र पत्रकारितालाई कमजोर बनाउने कार्य तत्काल बन्द गर्न माग गरेका छन् ।
पछिल्ला दिनमा समाचार लेखेकै आधारमा पत्रकारहरूमाथि धरपकड बढेको छ । समाचारको स्रोत खोज्न सञ्चारगृहमा प्रहरी प्रवेश गरेको घटनाले प्रेस स्वतन्त्रतामाथि प्रश्न उठेको छ ।
पत्रकारमाथिको धम्की र पक्राउको विषयमा विभिन्न दल र पत्रकारसम्बद्ध संस्थाहरूले विरोध जनाइरहेका छन् । उनीहरूले पक्राउ परेका पत्रकारको तत्काल रिहाइ र सञ्चारगृहमाथिको हस्तक्षेप बन्द गर्न माग गरेका छन् ।
स्वतन्त्र पत्रकारिता लोकतन्त्रको आधारस्तम्भ भएको भन्दै श्रेष्ठले प्रेसमाथिको कुनै पनि हस्तक्षेप स्वीकार्य नहुने बताएका छन् ।
