काठमाडौं — नयाँ पत्रिकाका वरिष्ठ संवाददाता नवराज मैनालीलाई नियन्त्रणमा लिने भन्दै शुक्रबार साँझ कार्यालय पुगेको प्रहरी टोली राति करिब आठ बजे त्यहाँबाट निस्किएको छ। प्रहरी साँझ सवा पाँच बजेतिर पत्रिकाको कार्यालय पुगेको थियो।
प्रहरीले पत्रिकाका सम्पादक खगेन्द्र पन्त र मैनालीलाई शनिबार बिहान १० बजे नेपाल प्रहरीको साइबर ब्युरोमा उपस्थित हुन निर्देशन दिएको छ। उपस्थित हुनुपर्ने कारणबारे लिखित जानकारी मागेपछि प्रहरीले मौखिक उर्दी दिँदै कार्यालय छाडेको पत्रिकाका पत्रकारहरूले बताएका छन्।
सम्पादक पन्तले के कारणले उपस्थित हुनुपर्ने हो भन्ने लिखित रूपमा जानकारी गराउन आग्रह गरेका थिए। त्यसपछि प्रहरी टोली भोलि बिहान उपस्थित हुन भन्दै निस्किएको हो।
पछिल्ला दिनमा समाचारकै विषयमा पत्रकारमाथि प्रहरी धरपकड बढेको भन्दै विभिन्न सञ्चारकर्मी संगठन र राजनीतिक दलले आपत्ति जनाइरहेका छन्। प्रेस काउन्सिल नेपालले पनि समाचारसँग सम्बन्धित विवादको समाधान आफ्नै प्रक्रिया र विधिबाट खोज्न आग्रह गरेको छ।
