काठमाडौं । समाचार लेखेकै कारण पत्रकार पक्राउ परेको र सञ्चारगृहमा प्रहरी पुगेको घटनाप्रति नेपाल प्रेस युनियनले कडा विरोध जनाएको छ । युनियनले पक्राउ परेका पत्रकारलाई तत्काल रिहा गर्न र सञ्चारमाध्यममा प्रहरी हस्तक्षेप रोक्न सरकारसँग माग गरेको छ ।
युनियनका महासचिव दिलीप पौडेलले शुक्रबार जारी गरेको विज्ञप्तिमा नेपाल प्रेस डटकमका विश्वमणि सुवेदी, मोटिभेट न्युजका शोभराज बराल र डिएनए खबरका धिरज बस्नेत पक्राउ परेको उल्लेख छ । युनियनले ती पत्रकार पक्राउ परेको घटनामा गम्भीर ध्यानाकर्षण भएको जनाएको छ ।
विज्ञप्तिअनुसार नयाँ पत्रिका दैनिकका नवराज मैनाली तथा दियोपोस्टका सुदीप विश्वकर्मा र मदन ढुंगानालाई पक्राउ गर्ने उद्देश्यले सादा पोशाकका प्रहरी सञ्चारगृह पुगेका थिए । युनियनले त्यस घटनाप्रति पनि आपत्ति जनाएको छ ।
समाचार प्रकाशनकै आधारमा पत्रकार नियन्त्रणमा लिनु र सञ्चारगृहमा प्रहरी परिचालन गरेर त्रास सिर्जना गर्नु संविधानले दिएको प्रेस तथा अभिव्यक्ति स्वतन्त्रतामाथिको प्रहार भएको युनियनको ठहर छ । कुनै समाचारप्रति असहमति भए कानुनी विधि र प्रक्रियाबाट समाधान खोज्नुपर्नेमा प्रहरी परिचालन गरेर धरपकड गर्नु लोकतान्त्रिक मूल्य र विधिको शासनविपरीत रहेको विज्ञप्तिमा उल्लेख छ ।
यस्ता गतिविधिले पत्रकारिता क्षेत्रलाई भयभीत बनाउनुका साथै नागरिकको सूचनाको हकसमेत कुण्ठित गर्ने भन्दै युनियनले प्रेस स्वतन्त्रता, पत्रकारको पेसागत सुरक्षा र नागरिकको सूचनाको हकको रक्षा गर्न सरकार गम्भीर हुनुपर्ने जनाएको छ । आगामी दिनमा प्रेस तथा अभिव्यक्ति स्वतन्त्रताविरोधी गतिविधि नदोहोर्याउन युनियनले सरकारलाई चेतावनीसमेत दिएको छ ।
