काठमाडौं — शुक्रबार साँझ समाचार कक्षबाट नियन्त्रणमा लिइएका पत्रकारहरू रिहा भएका छन्। सञ्चारमन्त्री विक्रम तिमल्सिनाले शुक्रबार राति सबै पत्रकार रिहा भइसकेको जानकारी दिएका हुन्।
शुक्रबार साँझ प्रहरीले नेपाल प्रेसका पत्रकार विश्वमणि सुवेदीलाई समाचार कक्षबाटै नियन्त्रणमा लिएको थियो। उनीसहित तीन जना पत्रकारलाई प्रहरीले नियन्त्रणमा लिएको थियो। समाचार लेखेकै आधारमा पत्रकार पक्राउ परेको भन्दै चौतर्फी विरोध भएको थियो।
सुवेदी साइबर ब्युरोमा भएको छलफलपछि साढे तीन घण्टामा रिहा भएका हुन्। एक प्रहरी अधिकारीले छलफलपछि उनी रिहा भएको बताएका छन्। यसअघि प्रधानमन्त्री बालेन शाहले पत्रकारमाथि धरपकड नगर्न प्रहरीलाई निर्देशन दिएका थिए।
मन्त्री तिमल्सिनाले सरकार प्रेस स्वतन्त्रताप्रति पूर्ण रूपमा प्रतिबद्ध रहेको बताएका छन्। उनले प्रेस स्वतन्त्रता र जिम्मेवार पत्रकारिता लोकतन्त्रका आधारस्तम्भ भएको उल्लेख गरेका छन्।
पत्रकार पक्राउको घटनापछि पत्रकार महासंघसहित विभिन्न संघसंस्था र राजनीतिक दलले विरोध जनाएका थिए। उनीहरूले तत्काल रिहाइको माग गरेका थिए।
