नेपाली कांग्रेसले सञ्चारगृहभित्र प्रहरी प्रवेश गरेर पत्रकारलाई नियन्त्रणमा लिने प्रवृत्ति तत्काल अन्त्य गर्न सरकारसँग माग गरेको छ। पार्टीका सभापति गगनकुमार थापाले विज्ञप्ति जारी गर्दै समाचार कक्षमा प्रहरी परिचालन गरेर पत्रकार पक्राउ गर्ने तरिकाले शाहीकालीन निरंकुशताको झल्को दिएको बताएका छन्।
थापाले जनताको दबाबपछि मात्रै रिहा गर्नेभन्दा कानुनविपरीत हुने पक्राउ र अनावश्यक हैरानी नै बन्द गर्नुपर्नेमा जोड दिएका छन्। विगतमा पनि शासकमाथि प्रश्न उठ्दा सत्ता र शक्तिको दुरुपयोग गरेर सञ्चार क्षेत्रमाथि हस्तक्षेप हुने गरेको स्मरण गराउँदै उनले यस्ता प्रवृत्ति फेरि दोहोरिनु लोकतन्त्रका लागि चिन्ताजनक भएको बताएका छन्।
कांग्रेसले आफ्नो स्थापनाकालदेखि नै प्रेस स्वतन्त्रता, नागरिक अधिकार र कानुनी शासनको पक्षमा संघर्ष गर्दै आएको उल्लेख गर्दै निरंकुश र स्वेच्छाचारी कदमविरुद्ध निरन्तर उभिने प्रतिबद्धता व्यक्त गरेको छ। स्वतन्त्र पत्रकारिता लोकतन्त्रको आधारस्तम्भ भएको भन्दै पार्टीले कुनै सञ्चारमाध्यम वा पत्रकारबाट गल्ती भएको अवस्थामा त्यसको निरूपणका लागि प्रेस काउन्सिललगायत स्थापित कानुनी तथा संस्थागत प्रक्रिया अपनाउनुपर्ने जनाएको छ।
ती प्रक्रियालाई बेवास्ता गर्दै सञ्चारगृहमा सोझै प्रहरी हस्तक्षेप गर्नु कानुनी शासनको अवधारणाविपरीत भएको कांग्रेसको ठहर छ। यस्तो प्रवृत्तिले कानुनको शासनको सट्टा कानुनलाई शासनको औजार बनाउने प्रवृत्तिलाई प्रोत्साहन गर्ने भन्दै विज्ञप्तिमा घटनाको कडा भर्त्सना गरिएको छ।
थापाले नियन्त्रणमा लिइएका व्यक्तिहरूको संवैधानिक अधिकारको रक्षा गर्न, सञ्चारगृहमा भइरहेको अनावश्यक प्रहरी हस्तक्षेप तत्काल रोक्न तथा कानुनी प्रक्रियाभन्दा बाहिर गएर गरिएका कदम सच्याउन सरकारसँग जोडदार माग गरेका छन्। प्रेस स्वतन्त्रताको रक्षा गर्नु र पत्रकारले निर्भयतापूर्वक काम गर्न पाउने वातावरण सुनिश्चित गर्नु लोकतान्त्रिक राज्यको दायित्व भएको सन्देशसमेत उनले दिएका छन्।
