सरकारी स्वामित्वको दुग्ध विकास संस्थानमा भएको ठूलो आर्थिक अनियमितताको छानबिनमा प्रहरीले संस्थानका तत्कालीन महाप्रबन्धकसहित आठ जनालाई पक्राउ गरेको छ। नेपाल प्रहरीको केन्द्रीय अनुसन्धान ब्यूरोले शुक्रबार सार्वजनिक गरेको विवरणअनुसार उनीहरूमाथि संस्थानलाई १२ करोड रुपैयाँभन्दा बढीको नोक्सानी पुर्याएको आरोप छ।
ब्यूरोका अनुसार संस्थानका उच्च अधिकारी, चिस्यान केन्द्रका प्रमुख र अन्य कर्मचारीको मिलेमतोमा योजनाबद्ध रूपमा छुट्टाछुट्टै समूह खडा गरी सङ्गठित सञ्जालमार्फत रकम हिनामिना गरिएको प्रारम्भिक अनुसन्धानबाट देखिएको छ। यसरी गैरकानुनी रूपमा १२ करोड १३ लाख ४३ हजार ५३० रुपैयाँ लाभ लिइएको आरोप उनीहरूमाथि लागेको छ।
पक्राउ पर्नेमा तत्कालीन महाप्रबन्धक तथा हाल प्रशासन तथा व्यवस्थापन विभाग प्रमुख सञ्जिव झा छन्। त्यसैगरी तत्कालीन चिस्यान केन्द्र इन्चार्जहरू विजयकुमार यादव, मनहरी शर्मा र रामकेवल राय पनि पक्राउ परेका छन्। कर्मचारीहरू जितेन्द्रकुमार यादव, नवीन राय यादव, शिवनन्दन राय र विखबहादुर भण्डारीलाई समेत प्रहरीले नियन्त्रणमा लिएको छ।
ब्यूरोका सहप्रवक्ता योगेन्द्रकुमार खड्काका अनुसार उनीहरूविरुद्ध मुलुकी अपराध संहिता, २०७४ अन्तर्गत आपराधिक विश्वासघात र सङ्गठित अपराध निवारण ऐन, २०७० अन्तर्गतको कसुरमा अनुसन्धान अघि बढाइएको छ। काठमाडौँ जिल्ला अदालतबाट पक्राउ अनुमति लिएर उनीहरूलाई २०८३ कात्तिक १३ गते विभिन्न स्थानबाट पक्राउ गरिएको हो।
