बलिउड अभिनेत्री राखी सावन्तमाथि भारतको झाँसीस्थित एक अदालतले पक्राउ आदेश जारी गरेको छ। सन् २०१० को एउटा टेलिभिजन कार्यक्रमसँग जोडिएको पुरानो मुद्दामा पटक–पटक उपस्थित हुन बोलाउँदा पनि उनी नगएको भन्दै अदालतले गैरजमानती वारेन्ट जारी गर्दै प्रहरीलाई उनलाई पक्राउ गर्न निर्देशन दिएको हो।
मुद्दा ‘राखी का इन्साफ’ नामक कार्यक्रमसँग सम्बन्धित छ। सन् २०१० मा प्रसारण भएको उक्त कार्यक्रममा झाँसीका २४ वर्षीय तरकारी व्यापारी लक्ष्मणप्रसाद अहिरवारलाई उनकी श्रीमती र परिवारकै अगाडि आपत्तिजनक शब्द प्रयोग गरी अपमान गरिएको थियो। कार्यक्रम प्रसारणको केही दिनपछि लक्ष्मणले आत्महत्या गरेका थिए।
घटनापछि मृतककी आमाको उजुरीका आधारमा प्रहरीले राखी सावन्त र उनको टोलीविरुद्ध मुद्दा दर्ता गरेको थियो। अनुसन्धानपछि प्रहरीले आरोपपत्र पेस गरेको र त्यसयता मुद्दाको सुनुवाइ भइरहेको जनाइएको छ।
अदालतले राखी र उनको टोलीलाई पक्राउ गरी सन् २०२६ को डिसेम्बर १ मा अदालतमा उपस्थित गराउन प्रहरीलाई आदेश दिएको भारतीय सञ्चारमाध्यमले उल्लेख गरेका छन्। डिसेम्बर १ को सुनुवाइले लामो समयदेखि विचाराधीन रहेको मुद्दाको आगामी प्रक्रिया तय गर्ने अपेक्षा छ।
वारेन्टपछि प्रतिक्रिया दिँदै राखीले आफू कार्यक्रमकी प्रस्तोता मात्र रहेको र च्यानलले भन्न लगाएका कुराहरू मात्र बोलेको दाबी गरेकी छन्। जेल जानुपर्ने अवस्था आए पनि तयार रहेको उनले बताएकी छन्।
