क्यानडाको अल्बर्टा प्रान्तस्थित वेनराइट सैनिक अखडामा ग्रिनेड प्रहार अभ्यासका क्रममा लागेको डढेलो फैलिँदा चार सैनिकको मृत्यु भएको छ। घटनामा ३९ जना घाइते भएका छन्, जसमध्ये २७ जनालाई अस्पताल भर्ना गरिएको छ।
क्यानेडियाली सशस्त्र बलको सैनिक प्रहरी समूहकी कमान्डर ब्रिगेडियर जनरल भेनेसा हानराहनका अनुसार अभ्यासका क्रममा ग्रिनेड लन्चर तालिम क्षेत्रमा आगो सल्किएको थियो। तीव्र हावाका कारण आगो नियन्त्रणबाहिर गएर अखडाका अन्य प्रशिक्षण क्षेत्रतर्फ फैलिएको थियो।
अग्निनियन्त्रकहरूले आगो नियन्त्रणमा ल्याउन ठूलो कसरत गरे पनि तालिम क्षेत्रको स्थायी जोखिमपूर्ण भूभागका कारण आगो निभाउन सिधै पस्न सकिएको थिएन। अधिकारीहरूका अनुसार यो क्यानडाको सेनामा शान्तिकालमा भएको सबैभन्दा गम्भीर दुर्घटनामध्ये एक हो।
घटनाका बेला तेस्रो बटालियन, प्रिन्सेस प्याट्रिसियाज क्यानडियन लाइट इन्फेन्ट्रीको चार्ली कम्पनीका सैनिकहरू तालिममा सहभागी थिए। उनीहरू लाट्भियामा प्रस्तावित सैन्य तैनाथीअघि तयारी अभ्यास गरिरहेका थिए। घटनाबारे थप अनुसन्धान भइरहेको छ।
