अमेरिकी राष्ट्रपति डोनाल्ड ट्रम्पको आग्रहका बाबजुद युक्रेनले रुसका तेल प्रशोधन केन्द्रहरुमाथि आक्रमण जारी राखेको छ। पछिल्ला केही दिनमा युक्रेनले रुसका तीनवटा तेल प्रशोधन केन्द्र र एउटा ग्यास–रासायनिक कारखानामा आक्रमण गरेको मस्कोले जनाएको छ।
अक्टोबर ३० मा युक्रेनले समारा क्षेत्रको नोभोकुइबिसेभ्स्क तेल प्रशोधन केन्द्रमा आक्रमण गर्यो। रुसको सरकारी ऊर्जा कम्पनी रोसनेफ्टले सञ्चालन गर्ने उक्त केन्द्रको वार्षिक क्षमता ८८ लाख मेट्रिक टन रहेको छ। त्यसपछि नोभेम्बर १ को राति निज्नी नोभगोरोड क्षेत्रको क्स्तोभो तेल प्रशोधन केन्द्रमा पनि ड्रोन आक्रमण भयो। लुकोइल कम्पनीले सञ्चालन गर्ने क्स्तोभो रुसको चौथो ठूलो तेल प्रशोधन केन्द्र हो र यसको वार्षिक क्षमता करिब एक करोड ७० लाख टन छ।
यसअघि अक्टोबर २९ मा द वाल स्ट्रिट जर्नलले युक्रेनले नोभेम्बर ३ मा हुने अमेरिकी मध्यावधि चुनावपछि सम्म आक्रमण रोक्न सहमति जनाएको दाबी गरेको थियो। तर युक्रेनी अधिकारीहरुले किभ इन्डिपेन्डेन्टसँग कुरा गर्दै युक्रेनले त्यस्तो कुनै सहमति नगरेको बताएका छन्। अमेरिकी विशेष दूत जेरेड कुस्नरले ३० दिनसम्म आक्रमण नगर्न प्रस्ताव गरेको भए पनि किभले त्यसलाई स्वीकार नगरेको उनीहरुको भनाइ छ।
रुसी उपप्रधानमन्त्री अलेक्जान्डर नोभाकले युक्रेनले तेल प्रशोधन केन्द्रमाथि गरेको आक्रमणले विश्व बजारमा इन्धन आपूर्तिमा असन्तुलन बढाएको बताएका छन्। क्रेमलिनका सहयोगी युरी उशाकोभले युक्रेनले ट्रम्पको आग्रहलाई बेवास्ता गरेको आरोप लगाए। ट्रम्पले यस्ता आक्रमणले डिजेलको मूल्य बढाएको भन्दै हप्तौँदेखि किभलाई आक्रमण रोक्न दबाब दिँदै आएका छन्।
युक्रेनी राष्ट्रपति भोलोदिमिर जेलेन्स्कीले रुसी आक्रमणको पूर्णरुपमा न्यायोचित जवाफ दिइने बताएका छन्, तर पछिल्ला आक्रमणहरुको सार्वजनिक रुपमा जिम्मेवारी भने लिएका छैनन्।
यसैबीच, रुसले रातभर युक्रेनका चार क्षेत्रका विद्युत् पूर्वाधारमा आक्रमण गर्दा लाखौँ उपभोक्ता विद्युत्विहीन भएका छन्। रुसी रक्षा मन्त्रालयले एक रातमा २३५ युक्रेनी ड्रोन खसालेको दाबी गरेको छ भने युक्रेनले रुसले पठाएका ४३३ वटा ड्रोनमध्ये ३७१ वटा खसालेको जनाएको छ।
