काठमाडौं । सभामुख डोलप्रसाद अर्यालले संयुक्त राज्य अमेरिकाको तल्लो सदनको वेज एण्ड मिन्स कमिटीका सभापति जेसन स्मिथको नेतृत्वमा आएको संसदीय प्रतिनिधिमण्डलसँग शिष्टाचार भेट गरेका छन् । भेटमा दुई देशबीचको सम्बन्ध, पारस्परिक सहयोग, आर्थिक साझेदारी, जलवायु परिवर्तनले निम्त्याएको विपद् व्यवस्थापन र संसदीय सहकार्यका विषयमा छलफल भएको सभामुखको सचिवालयले जनाएको छ ।
सभामुख अर्यालले रसुवा तथा भोटेकोशी क्षेत्रमा आएको बाढीबाट सिर्जित विपद् सामना गर्न सरकारले हरसम्भव प्रयास गरिरहेको बताए । कठिन समयमा अमेरिकाले देखाएको ऐक्यबद्धता र सहयोगका लागि उनले धन्यवाद दिए । तान्जानियाको आरुषामा हालै सम्पन्न अन्तरव्यवस्थापिका सङ्घको १५३औँ महासभामा नेपालले प्रस्तुत गरेको आपत्कालीन एजेन्डा दुई तिहाइभन्दा बढी मतले पारित भएको जानकारी पनि उनले गराए । उक्त एजेन्डाले जलवायुसम्बन्धी विपद्को सामना गर्न र हिमालय क्षेत्रसहित जोखिममा रहेका क्षेत्रको उत्थानशीलता बलियो बनाउन तत्काल संसदीय पहलको माग गरेको थियो ।
जलवायु परिवर्तनका कारण उच्च जोखिममा रहेका क्षेत्रमा क्षति घटाउन र पूर्वतयारी सुधार्न अन्तरराष्ट्रिय तथा अन्तरसंसदीय सहकार्य अझ प्रभावकारी हुनुपर्नेमा सभामुख अर्यालले जोड दिए । नेपाल–अमेरिका सम्बन्धलाई परम्परागत सहयोगको घेराबाट बाहिर निकालेर लगानी तथा आर्थिक साझेदारीतर्फ लैजानुपर्ने बताउँदै उनले लगानीमैत्री वातावरण र लगानीकर्ताको विश्वासका लागि आवश्यक नीतिगत तथा कानुनी सुधारमा प्रतिबद्ध रहेको उल्लेख गरे ।
भेटमा अमेरिकी प्रतिनिधिमण्डलले भोटेकोशी बाढीबाट भएको क्षतिप्रति सहानुभूति व्यक्त गर्दै ज्यान गुमाउनेहरूप्रति श्रद्धाञ्जली र शोकसन्तप्त परिवारप्रति दुःख व्यक्त गर्यो । नेपालको विकासमा निरन्तर सहयोग गर्ने र संसदीय कूटनीतिक सम्बन्ध अझ सुदृढ बनाउने इच्छा पनि प्रतिनिधिमण्डलले व्यक्त गर्यो । भेटमा प्रतिनिधिसभाको अन्तरराष्ट्रिय सम्बन्ध तथा पर्यटन समिति र संसदीय सुनुवाइ समितिका सभापतिसमेत सहभागी थिए ।
