अर्नब चक्रवातको असरले मुस्ताङमा शुक्रबार रातिदेखि भारी हिमपात र निरन्तर वर्षा भइरहेको छ। उपल्लो मुस्ताङमा बाक्लो हिउँ परिरहेको छ भने तल्लो भेगमा झरी नरोकिएपछि स्थानीयको दैनिकी अस्तव्यस्त बनेको छ।
प्रमुख जिल्ला अधिकारी परशुराम पोखरेलका अनुसार लोमान्थाङ र लोघेकर दामोदरकुण्ड गाउँपालिकामा शुक्रबार रातिदेखि हिमपात जारी छ। वारागुङ मुक्तिक्षेत्र गाउँपालिका–३ छुसाङदेखि तलको क्षेत्रमा पनि सोही समयदेखि पानी परिरहेको छ।
नेपाल–चीन सीमास्थित कोरला नाका वरपर दुईदेखि तीन फिटसम्म हिउँ जमेको सशस्त्र प्रहरी बलको न्हेचुङस्थित बोर्डर आउट पोस्टले जनाएको छ। हिमपातले जोखिम बढेपछि कोरलातर्फ जाने सडकमा सवारीसाधन र पर्यटकको आवागमन रोकिएको छ। न्हेचुङबाट कोरला जाने र न्हेचुङबाट जोमसोम झर्ने भन्सार जाँचपास भइसकेका कन्टेनर तथा विद्युतीय सवारीसाधनलाई समेत नहिँड्न भनिएको छ। मौसम सामान्य नभएसम्म सीमा व्यापार र निकासी–पैठारी कारोबार नगर्न अनुरोध गरिएको बोर्डर आउट पोस्टका प्रमुख सशस्त्र प्रहरी निरीक्षक प्रकाश धितालले बताए।
लोमान्थाङ गाउँपालिकाका अध्यक्ष टसी गुरुङका अनुसार कात्तिक महिनामा यति बाक्लो हिमपात भएको यो पहिलोपटक हो। उपल्लो मुस्ताङका बस्ती, खर्क, पाटन र उच्च लेकका क्षेत्र हिउँले ढाकिएका छन्। चिसो बढेसँगै स्थानीयको जनजीवन प्रभावित भएको उनले बताए।
यसैबीच, वर्षापछि खसेको पहिरोले जोमसोम–कोरला सडकखण्ड अवरुद्ध भएको छ। घरपझोङ गाउँपालिका–४ जोमसोमदेखि माथिको सडक र वारागुङ मुक्तिक्षेत्र गाउँपालिका–३ छुसाङमा पहिरो खसेपछि यातायात ठप्प भएको जिल्ला प्रहरी कार्यालयका सूचना अधिकारी ईश्वर महतले जानकारी दिए। प्रशासनले मुस्ताङमा रहेका पर्यटक, सर्वसाधारण र कन्टेनर चालकलाई सुरक्षा सावधानी अपनाउन आग्रह गरेको छ।
