हेटौँडामा रहेको बागमती प्रदेश प्रहरी कार्यालयले असोज महिनाको तथ्याङ्क सार्वजनिक गरेको छ। विवरणअनुसार प्रदेशका १० जिल्लामा उक्त महिनामा १६३ सडक दुर्घटना भए, जसमा २१ जनाको ज्यान गयो भने २८५ जना घाइते भए। सोही अवधिमा नियम उल्लङ्घन गर्ने ५ हजार ४०६ सवारीसाधनमाथि कारबाही गरिएको छ।
अपराधतर्फ असोजमा जम्मा ४३० घटना दर्ता भएका छन्। तीमध्ये जघन्य तथा गम्भीर अपराध १४५, महिला, बालबालिका र ज्येष्ठ नागरिकसँग जोडिएका अपराध ३०, आर्थिक अपराध ११ र अन्य अपराध २४४ छन्। कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद धमलाका अनुसार अनुसन्धान र नियन्त्रणका क्रममा ३४० जना पक्राउ परे। फैसला कार्यान्वयनमा फरार रहेका २७३ प्रतिवादी पनि समातिए, जसबाट ३६५ वर्ष ७ महिना २२ दिन कैद र २ करोड ४५ लाख ३५ हजार रुपैयाँ जरिवाना असुल भयो।
घरेलु हिंसाका ६६ निवेदन परेकामा ४३ वटामा मिलापत्र भयो, ८ वटा अदालत पुगे, ३ वटाका पीडित सम्पर्कमा आएनन् र १२ वटा अनुसन्धानमै छन्। असोजमा १७८ जना हराएकामा १२९ जना भेटिए भने ४९ जनाको खोजी जारी छ। लागुऔषधका ५१ मुद्दामा ९६ जना पक्राउ परे। आत्महत्याका ५४ घटना भए।
राजस्व चुहावट र भन्सार छलीमा ४६ लाख ७ हजार ५८ रुपैयाँका सामानसहित तीन जना पक्राउ परे। अवैध मदिरातर्फ १५ हजार ७६२ लिटर घरेलु मदिरा र ४ हजार ४०५ लिटर कच्चा पदार्थ बरामद भयो। प्राकृतिक सम्पदा दोहनमा संलग्न ८१ सवारीसाधनलाई जरिवाना गरी छाडियो र १८ लाख ६९ हजार रुपैयाँ राजस्व उठ्यो। असोज २५ मा धादिङको त्रिपुरासुन्दरीमा बुढीगण्डकीको बाढी प्रभावित क्षेत्रमा १४५ प्रहरी खटाइएको थियो।
