काठमाडौँ । दिनभरका मुख्य घटनाक्रमहरूको संग्रह — यहाँ छन् आजका प्रमुख समाचार।
कोशी प्रदेशका ‘गेमचेन्जर’ मानिने केही ठूला आयोजना निर्माणको अन्तिम चरणमा पुगेको राष्ट्र बैंकको प्रादेशिक प्रतिवेदन २०८२–८३ ले देखाएको छ। तर मुआब्जा विवाद, बजेटको अभाव र निर्माण व्यवसायीका आन्तरिक समस्याले कतिपय योजना भने सुस्त गतिमा अघि बढिरहेका छन्।
थाइल्याण्डमा बनेको गाँजा म्यानमारका भरियामार्फत हवाई मार्गबाट काठमाडौँ ल्याउने र यहाँलाई ट्रान्जिट बनाएर भारततर्फ तस्करी गर्ने गिरोहको रहस्य खुलेको छ। प्रहरीका अनुसार पैसाको लोभमा लागु पदार्थ ओसारपसार गर्नेले यति घुमाउरो बाटो रोज्ने गरेका छन्।
नेपाली पुँजीबजार नौ दशकको यात्रामा ठूलो फड्को मारेको छ, तर यसलाई व्यवस्थित बनाउन अझै धेरै सुधार आवश्यक रहेको सरोकारवालाको भनाइ छ।
पोखराको पद्म नर्सिङ होमलाई एक सय शय्याको अनुमति दिने प्रक्रियामा ३० लाख रुपैयाँ घुस डिल गरेको आरोप लागेका गण्डकीका पूर्वस्वास्थ्यमन्त्री लक्ष्मणबहादुर पाण्डे र उनका स्वकीय सचिव यादव पौडेलमाथि कारबाही सिफारिस गरिएको छ।
सरकारले सञ्चालन गर्दै आएको राष्ट्रिय भिटामिन ए तथा जुकाको औषधि वितरण कार्यक्रमको पहिलो चरण आगामी कात्तिक १७ र १८ गते हुनेछ।
जनता समाजवादी पार्टी नेपालले सरकार बनाउने कुनै दाबी नगरेको र नेकपा (एमाले) सँग सहकार्य नगर्ने स्पष्ट गरेको छ। एमाले अध्यक्ष केपी शर्मा ओलीसँगको भेटको फोटो सार्वजनिक भएपछि अध्यक्ष उपेन्द्र यादवले सामाजिक सञ्जालमार्फत यो प्रस्टीकरण दिएका हुन्।
न्याय सम्पादन छिटोछरितो बनाउन सर्वोच्च अदालतले २० बुँदे आन्तरिक निर्देशन जारी गरेको छ। सेवाग्राही उपस्थित भएको एक घण्टाभित्र तारेख र नक्कल दिनुपर्ने तथा चार वर्ष पुराना मुद्दामा ३० दिनभन्दा बढीको पेसी नतोक्नेजस्ता प्रावधान कात्तिक १ गतेदेखि लागू हुनेछन्।
दसैँको मौसममा मासुको खपत बढेसँगै कोशीमा मासु उत्पादन बढे पनि उपभोक्ताले महँगो मूल्य तिर्नुपर्ने अवस्था छ। प्रशासनले खसी–बोकाको अधिकतम खुद्रा मूल्य तोके पनि कार्यान्वयन कमजोर रहेको छ।
पूर्वप्रधानमन्त्री एवं नेकपा नेता झलनाथ खनाल अस्पताल भर्ना भएका छन्।
काठमाडौँबाट खोटाङ जाँदै गरेको को १ ज २९७६ नम्बरको सुमो सिन्धुलीको फिक्कल गाउँपालिका–६ नागथानमा सुनकोशी नदीमा खस्दा मृत्यु हुने तीन जना र बेपत्ताको पहिचान खुलेको छ।
