मुस्ताङ। दसैँको चहलपहलसँगै हिमाली भेडा र च्याङ्ग्राको ठूलो व्यापार मुस्ताङ हुँदै सम्पन्न भएको छ। कृषि तथा पशु विकास कार्यालयका अनुसार यस वर्षको दसैँमा मुस्ताङ मार्गबाट करिब ३५ करोड रुपैयाँ बराबरका भेडा–च्याङ्ग्रा बिक्रीका लागि बेसीतर्फ झारिएको छ।
कार्यालयको तथ्याङ्कअनुसार यस अवधिमा ११ हजार १६४ च्याङ्ग्रा र दुई हजार ११५ भेडासहित कुल १३ हजार २७९ पशुधन निकासी भएको छ। कार्यालयका प्रमुख डा लालमणि अर्यालका अनुसार मुस्ताङबाट मात्रै २२ करोड रुपैयाँभन्दा बढीको कारोबार भएको छ भने डोल्पा, मुगु र जुम्लाबाट १३ करोड बराबरको पशुधन यही मार्ग हुँदै बाहिरिएको छ।
मुस्ताङबाट सात हजार ९६४ च्याङ्ग्रा र एक हजार २०४ भेडा निकासी भएका छन्। तीमध्ये मुस्ताङका किसानले पालेको खोरपाला र तिब्बतबाट कोरलानाका हुँदै भित्र्याइएका ४०० भन्दा बढी भेडा–च्याङ्ग्रा व्यापारीहरूले पोखरा र काठमाडौँलगायतका बजारमा पुर्याएका छन्। डोल्पाबाट दुई हजार ६८० च्याङ्ग्रा र ८७१ भेडा, जुम्लाबाट ३०० च्याङ्ग्रा तथा मुगुबाट ३२० च्याङ्ग्रा र ४० भेडा निकासी गरिएको छ।
कार्यालयका अनुसार यस वर्ष च्याङ्ग्राको औसत मूल्य ३३ हजार, भेडाको २२ हजार र च्यालु (माउ) को १० हजार रुपैयाँ कायम गरिएको थियो।
