उत्तर कोरिया । उत्तर कोरियाले कृत्रिम बौद्धिकता प्रयोग गरेर लक्ष्य पहिचान गर्न र आक्रमणको बाटो तय गर्न सक्ने नयाँ किसिमको तीव्रगतिको टारपीडोको परीक्षण गरेको छ। यसले कोरियाली प्रायद्वीपमा हतियार प्रतिस्पर्धा थप चर्किने सङ्केत गरेको छ।
उत्तर कोरियाको सरकारी समाचार संस्था केसीएनएका अनुसार बिहीबार ‘सुपर–स्पिड जाम–२.०’ टारपीडोको पानीमुनि परीक्षण गरिएको हो। प्योङयाङले पछिल्ला पाँच वर्षमा यो प्रणालीको विकासका क्रममा १८० भन्दा बढी परीक्षण गरेको बताएको छ।
विश्लेषकहरूका अनुसार युक्रेनविरुद्धको युद्धमा रुसलाई सहयोग गर्न सेना पठाएबापत मस्कोबाट प्राप्त हुन सक्ने सहयोगले उत्तर कोरियाको हतियार प्रविधि विकासलाई गति दिन सक्छ। प्योङयाङले केही दिनअघि मात्र पनडुब्बीबाट दुई किसिमका क्रुज क्षेप्यास्त्र परीक्षण गरेको घोषणा गरेको थियो।
क्युङनाम विश्वविद्यालयका प्राध्यापक लिम युल–चुलका अनुसार एआईले टारपीडोलाई वास्तविक लक्ष्य र छल्न प्रयोग गरिने नक्कली लक्ष्यबीच छुट्याउन सहयोग गर्न सक्छ। उत्तर कोरियाले अमेरिकी रणनीतिक सैन्य साधनलाई प्रभावहीन बनाउने उद्देश्यले टारपीडो र पनडुब्बीबाट प्रक्षेपण हुने हतियारमा लगानी बढाइरहेको उनको भनाइ छ।
यसै महिनाको सुरुमा उत्तर कोरियाले एआईको सहयोगमा मध्यम दूरीको हाइपरसोनिक क्षेप्यास्त्र परीक्षण गरेको बताएको थियो। त्यसको केही दिनपछि दक्षिण कोरियाले पनि हाइपरसोनिक ग्लाइड वाहनको परीक्षण गरेको थियो। ध्वनिको गतिभन्दा पाँच गुणा छिटो उड्ने र उडानकै क्रममा दिशा परिवर्तन गर्न सक्ने हाइपरसोनिक क्षेप्यास्त्रलाई पत्ता लगाउन तथा रोक्न कठिन मानिन्छ।
उत्तर कोरियाले दक्षिण कोरियाको परीक्षणले हाइपरसोनिक उडान हासिल गर्न नसकेको दाबी गरे पनि सियोलले त्यसलाई अस्वीकार गरेको थियो। उत्तर कोरियाली नेता किम जोङ उनले गत सेप्टेम्बरमा देशको हतियार प्रणालीमा एआईको प्रयोग बढाउन जोड दिएका थिए।
नोभेम्बरमा चीनमा हुने एपेक शिखर सम्मेलनअघि अमेरिकी राष्ट्रपति डोनाल्ड ट्रम्प र किमबीच सम्भावित भेटवार्ताको चर्चा बढेको छ। सियोलस्थित उत्तर कोरियाली अध्ययन विश्वविद्यालयका पूर्वअध्यक्ष याङ मू–जिनका अनुसार सम्भावित शिखर वार्ताअघि उत्तर कोरियाले दक्षिण कोरियाको तुलनामा आफ्नो हतियार कार्यक्रम उन्नत रहेको देखाउन खोजेको हुन सक्छ। तर टारपीडो प्रणालीलाई थप विकसित गर्न उत्तर कोरियालाई अझै समय लाग्न सक्ने याङको भनाइ छ। पानीमुनि उच्च गतिमा चल्दा टारपीडोले ठूलो आवाज निकाल्ने भएकाले त्यसलाई पत्ता लगाउन सजिलो हुने र आवाज कम गर्नु प्रमुख प्राविधिक चुनौती रहेको उनले बताए।
