कीर्तिपुर — नेपाल प्रिमियर लिगको शनिबारको एक मात्र खेलमा काठमाडौं गोर्खाजले लुम्बिनी लायन्ससामु १६१ रनको लक्ष्य राखेको छ। त्रिवि अन्तर्राष्ट्रिय क्रिकेट रंगशालामा टस हारेर पहिले ब्याटिङ गर्नुपरेको काठमाडौंले निर्धारित २० ओभरमा ८ विकेट गुमाएर १६० रन जोड्यो।
काठमाडौंको पारीको मेरुदण्ड अनुभवी ओपनर डेभिड वार्नरको अर्धशतक बन्यो। उनले ५० बलको सामना गर्दै ९ चौका र १ छक्का प्रहार गर्दै ६६ रन बनाए। उनलाई साहिल पटेलले ३६ बलमा ३८ रन बनाएर साथ दिए भने शहन आराचिघेले १५ बलमा ३४ रनको आक्रामक पारी खेल्दै टोलीलाई सम्मानजनक योगफलसम्म पुर्याए।
बलिङतर्फ लुम्बिनीका शेर मल्ल, अभिशेष गौतम र रुबेन ट्रम्पलम्यानले समान दुई–दुई विकेट हात पारे। तीनै बलरले काठमाडौंको मध्यपंक्तिलाई बाँधेर राख्दा ठूलो योगफल बन्न सकेन।
यो खेलअघि लुम्बिनी चार खेलमा तीन जित र एक खेलमा अंक बाँड्दै ७ अंकसहित तालिकाको शीर्ष स्थानमा छ। दुई जित र एक हारसहित ४ अंक जोडेको काठमाडौं भने चौथो स्थानमा छ। यसअघिका संस्करणमा दुई टोलीबीच भएका तीन खेलमा लुम्बिनीले एक र काठमाडौंले दुई खेल जितेका छन्। जित निकाल्ने टोलीले तालिकामा आफ्नो स्थिति थप बलियो बनाउनेछ।
