अमेरिकी अदालतले राष्ट्रपति डोनाल्ड ट्रम्पले वाल स्ट्रिट जर्नल र त्यसका मालिक रुपर्ट मर्डकविरुद्ध दायर गरेको अर्बौं डलरको मानहानि मुद्दा खारेज गरिदिएको छ।
पत्रिकाले प्रकाशित गरेको एउटा खोजमूलक रिपोर्टमा ट्रम्पको सम्बन्ध विवादास्पद धनाढ्य जेफ्री एप्स्टिनसँग रहेको उल्लेख थियो। रिपोर्टअनुसार सन् २००३ मा एप्स्टिनको ५०औँ जन्मदिनका अवसरमा तयार पारिएको एउटा एल्बममा ट्रम्पको नाम लेखिएको चिठी भेटिएको थियो। उक्त चिठीमा एक निर्वस्त्र महिलाको रेखाचित्र बनाइएको र अन्त्यमा जन्मदिनको शुभकामना लेखिएको थियो।
ट्रम्पले आफूले त्यस्तो चिठी कहिल्यै नलेखेको र समाचार झुटो भएको दाबी गर्दै यसले आफ्नो छविमा गम्भीर क्षति पुर्याएको बताएका थिए। तर मियामीका न्यायाधीश ड्यारिन गेल्सले ट्रम्पको दाबी स्वीकार गरेनन्।
न्यायाधीशका अनुसार ट्रम्पले पत्रिकाले जानीजानी वा दुर्भावनापूर्ण ढंगले समाचार छापेको भन्ने कुरा प्रमाणित गर्न सकेनन्। उनका दलीलहरू निराधार रहेको अदालतको ठहर छ। न्यायाधीशले ट्रम्पले जबरजस्ती पत्रिकाको अनुसन्धानमा कमीकमजोरी खोज्ने प्रयास गरिरहेको समेत टिप्पणी गरे।
अदालतले यो फैसला स्थायी रूपमा सुनाएको छ। त्यसको अर्थ अब ट्रम्पले यही विषयलाई लिएर फेरि अदालत जान पाउने छैनन्।
जेफ्री एप्स्टिन न्युयोर्कका करोडपति फाइनान्सर थिए र ठूला नेता तथा सेलिब्रेटीहरूसँग उनको निकट सम्बन्ध थियो। सन् २००५ मा उनीमाथि नाबालिगमाथि यौन दुर्व्यवहारको आरोप लागेको थियो भने सन् २००८ मा नाबालिगसँग यौनसम्पर्कको माग गरेको अभियोगमा उनी दोषी ठहरिए। त्यसपछि उनलाई १३ महिनाको जेल सजाय भएको थियो।
सन् २०१९ मा एप्स्टिनलाई सेक्स ट्राफिकिङको आरोपमा पक्राउ गरिएको थियो, तर मुद्दाको सुनुवाइ हुनुअघि नै उनले जेलमा आत्महत्या गरे। उनकी पार्टनर घिस्लेन म्याक्सवेललाई सन् २०२१ मा सहयोग गरेको आरोपमा दोषी ठहर गरियो र हाल उनी २० वर्षको जेल सजाय काटिरहेकी छन्।
