आज (३१ असोज) ओमानमा जारी आईसीसी क्रिकेट विश्वकप लिग २ अन्तर्गत नेपालले क्यानडासँग प्रतिस्पर्धा गर्दै छ। ओमान क्रिकेट एकेडेमी टर्फ १ मा सुरु भएको खेलमा क्यानडाका कप्तान हम्जा तारिकले टस जिते र पहिले ब्याटिङ गर्ने निर्णय लिए। त्यससँगै नेपाल पहिले बलिङमा उत्रिएको छ।
नेपाली टोलीमा आज एउटा परिवर्तन छ — अलराउन्डर गुल्सन झा प्लेइङ ११ मा फर्किएका छन्, उनले सन्दीप जोराको स्थान लिएका हुन्। कप्तान सन्दीप लामिछानेको नेतृत्वमा दीपेन्द्रसिंह ऐरी, रोहित पौडेल, आसिफ शेख, अर्जुन कुमाल, इशान पान्डे, बसिर अहमद, करण केसी, नन्दन यादव र ललित राजवंशी मैदानमा छन्।
यस शृङ्खलामा नेपालले यसअघि क्यानडा र ओमान दुवैलाई पराजित गरिसकेको छ। क्यानडाले भने सुरुवाती दुई खेल गुमाएपछि बिहीबार ओमानविरुद्ध जित दर्ता गरेको थियो। अंकतालिकामा नेपाल ३४ खेलबाट २८ अंकसहित छैटौं र क्यानडा ३५ खेलबाट २७ अंकसहित सातौं स्थानमा छ। आजको खेलमा नेपाल विजयी भए छैटौं स्थान पक्का हुनेछ; पराजित भए क्यानडा छैटौंमा उक्लनेछ र नेपालले अन्तिम खेलमा ओमानलाई जित्नैपर्ने हुनेछ।
